İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 66 Hüküm no: 14 Orijinal metin no: [6-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fettah Bey’in kızı Ayşe Hanım’ın sahip olduğu malları yeni kocası Mustafa üzerine geçirme teşebbüsünde olduğu oğulları tarafından bildirildiğinden Bâbıâlî’den izin alınmadan bir işlem yapılmaması Ma‘rûz Cabbarzâde merhûm Fettah Bey kerîmesi Âişe Hanım’ın kâffe-i akār ve emlâk ve eşyâsını zevc-i lâhıkı olan Mustafa nâm kimesne uhdesine intikāl ettirmek üzere bulunduğuna dâir evlâdı tarafından takdîm olunan arzuhâl Meclis-i Vâlâ-yı Ahkâm-ı Adliye’ye lede’l-i‘tâ taraf-ı âlî-i Meşîhat-penâhîleriyle bi’l-muhâbere iktizâ-yı şer‘îsi anlaşılarak ve ba‘dehû keyfiyet mevki‘-i müzâkereye konularak mûmâ-ileyhâ Âişe Hanım’ın mutasarrıfa olduğu emlâk-i vakfiye ve mîrîyenin ve eshâm ve du‘âgû vazîfesinin ve mukāta‘atın ferâğ ve kasr-ı yed edilmesi murâd olunup da gerek mehâkim-i şer‘iyeye ve gerek devâir-i sâireye mürâca‘at vukū‘unda Bâbıâlî’den istîzân olunmadıkça mu‘âmele icrâ edilmemesi zımnında iktizâ eden mahallere tebellügāt icrâsı Meclis-i Vâlâ’da tasvîb olunup keyfiyet Mâliye ve Evkāf-ı hümâyûn nezâret-i celîlelerine iş‘âr kılınmağla mûmâ-ileyhânın vakıf olmayan arâzî ve emlâki hakkında dahi mehâkim-i şer‘iyeye mürâca‘at vukū‘u takdîrinde karâr-ı mezkûra tevfîk mu‘âmele olunması için îcâb edenlere tenbîhât icrâ buyurulması bâbında emr ü irâde hazret-i men-lehu’l-emrindir. Fî 16 Receb sene [1]282 ve fî 22 Teşrîn-i sânî sene [1]281.