İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 68 Hüküm no: 19 Orijinal metin no: [9-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Kostanti ve Ayanoğlu adlı tüccara kanuna uygun olarak imtiyaz beratı verilmesi Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezailehû- tevkī‘-i refî‘-i hümâyûnum vâsıl olucak ma‘lûm ola ki, Âsitâne-i sa‘âdetimde ve memâlik-i mahrûsemden mevki‘-i ticâret olan ba‘zı mahallerde bulunan Devlet-i aliyyem tüccârından memâlik-i ecnebiye ticâreti etmek isteyenlere ticâretçe ba‘zı şurût-ı imtiyâziye derciyle başka başka berevât ve ikişer nefer hizmetkârlarına dahi evâmir-i şerîfem i‘tâ olunması müesses olan nizâmı muktezâsından olmakdan nâşî teba‘a-i gayr-ı Müslime tüccârından Dersa‘âdet’imde Vâlidehânı’nda mütemekkin Yorgi v. Kostanti ve Ayanoğlu nâm tâcir yedine ber-mûceb-i şurût ve nizâm i‘tâ kılınan berat-ı şerîfim İstanbul Bâb Mahkemesi sicilline kayd ve sebt ve mûceb-i muktezâsıyla amel ve hareket olunmak bâbında emr-i şerîfim sudûrunu tüccâr-ı merkūmenin vekîlleri memhûr varaka ile istid‘â eyledikleri Ticâret Nezâreti tarafından bâ-takrîr ifâde olunmuş olmağla sen ki mevlânâ-yı mûmâ-ileyhsin tâcir-i mûmâ-ileyhe verilen mârrü’z-zikr berat-ı âlîşânım İstanbul Bâb Mahkemesi sicilline kayd ve sebt ve yedine ibkā birle mugāyir hâl ve hareket vukū‘u tecvîz olunmaması ve himâyet ve sıyâneti husûslarına mübâderet olunmak bâbında işbu fermân-ı âlîşânım sâdır olmağın mazmûn-ı münîfi üzere amel ü hareket eyleyesin, şöyle bilesin, alâmet-i şerîfe i‘timâd kılasın. Tahrîren fî-evâhiri şehri Zilka‘deti’ş-şerîfe li-sene isnâ ve semânîn ve mieteyn ve elf.