İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 69 Hüküm no: 20 Orijinal metin no: [9-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Kostanti ve Ayanoğlu adlı ecnebi tüccara kanuna uygun olarak imtiyaz beratı verilmesi Ecnebi tüccârlar Berren ve bahren Avrupa ve Amerika ve memâlik-i sâire-i ecnebiye ticâretiyle me’lûf olan teba‘a-i gayr-ı Müslime tüccârının serbestî-i ticâretleri zımnında ba‘zı imtiyâzât-ı mahsûsaya nâiliyetleri bi’t-tensîb bunlara Avrupa tüccârı ta‘bîr olunur mu‘teber ve müntahablarından iki nefer vekîl nasb u ta‘yîn ile bir gûnâ cürüm ve cinâyetleri tahakkuk etmedikçe azl ve tebdîl olunmayıp kabâhatleri tahakkuk ettiği ve âhar sebeble azilleri geldiği hâlde Ticâret Nezâret-i celîlesi ma‘rifetiyle ihrâc olunup yerlerine cümlenin mu‘teber ve müntahabı olan âhar münâsibleri nasb u ta‘yîn kılınarak yedlerine evâmir-i şerîfem i‘tâ kılınıp sâir bu silke dâhil olmak isteyenlerin hâl ve keyfiyetleri evvel-emirde onların ma‘rifetleriyle bi’t-tahkīk fî nefsi’l-emr ehl-i ırz ve beyne’t-tüccâr istikāmetle mücerrebü’l-etvâr olduğunu ihbâr eyledikleri sûretde isim ve şöhreti ve mahâl ve memleketi tasrîhiyle verecekleri memhûr şehâdetnâmeler üzerine nezâret-i müşârün-ileyhâ tarafından takdîm olunacak takrîr mûcebince sınıf-ı mezkûra dâhil olduklarını müş‘ir yedlerine zikri âtî ticâret şurûtu derciyle berevât ve nizâmları mûcebince istihdâm edecekleri ikişer nefer hizmetkârlarına dahi evâmir-i şerîfem verilmekde idiğine binâen teba‘a-i gayr-ı Müslime tüccârından Dersa‘âdet’imde Vâlidehânı’nda mütemekkin râfi-i tevkī‘-i refî‘ü’ş-şân-ı hâkānî Yorgi v. Kostanti ve Ayanoğlu nâm tâcir ticâret-i mezkûre ile me’lûf olarak beyne’t-tüccâr müstakīm ve mu‘teber idiği beyânıyla ber-mûceb-i şurût ve nizâm berat-ı âlîşânım i‘tâsı vekîlleri tarafından memhûr şehâdetnâme takdîmiyle inhâ ve istid‘â olunduğu müşârün-ileyhâ Ticâret Nezâreti tarafından bâ-takrîr ifâde olunmuş olmağın ol bâbda.