İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 71 Hüküm no: 23 Orijinal metin no: [11-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlevihane kapısı dahilindeki Mimar Acem mahallesinde Pazartesi günü pazar kurulmasına ruhsat verildiği İftihârü’l-e‘âlî ve’l-e‘âzım muhtârü’l-ekâbir ve’l-efâhim müstecmi‘u cemî‘i’l-ma‘âlî ve’l-mekârim el-muhtassu bi-mezîd-i inâyeti’l-meliki’d-dâim e‘âzım-i ricâl-i Devlet-i aliyyemden kethudâ-yı mehd-ulyâ-yı saltanat-ı seniyyem ve şehremîni olup birinci rütbe-i Osmânî ve ikinci rütbe-i Mecîdî nişân-ı zî-şânlarını hâiz ve hâmil olan Hüseyin Bey -dâme ulüvvuhû- akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u’l-a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul kādısı ve zikrolunan mecîdî nişân-ı hümâyûnumun ikinci rütbesinin hâiz ve hâmili olan Yusuf Paşa hafîdi Mevlânâ Ahmed Muhtâr Bey -zîdet fezailehû- tevkī‘-i refî‘-i hümâyûnum vâsıl olucak ma‘lûm oldur ki, Mevlevihâne kapısı dâhilinde kâin Mi‘mar Acem nâm mahalleye civâr mahallâtda sâkin ve mutavattın ahâlînin havâyic-i zarûriye ve malzeme-i mukteziyelerinin tedâriki emrinde su‘ûbet ve meşakkat çekmekde olduklarından bâ‘is-i yüsr ve suhûlet ve menfa‘at olmak ve emsâli misillü beher hafta Pazarertesi günlerine mahsûs bulunmak üzere mahalle-i mezkûrede müceddeden pazar küşâdı husûsuna müsâ‘ade-i seniyye-i mülûkânem erzân ve şâyân kılınması bâ-arzuhâl istid‘â ve istirhâm olunmuş ve keyfiyet Mâliye Nezâret-i celîlesi tarafından dahi bâ-takrîr ifâde kılınmış olup beyâna hâcet olmadığı üzere kâffe-i memâlik-i mahrûse-i şâhânemde ve husûsuyla Dârü’l-hılâfeti’l-aliyyemde sâkin ve mutavattın sunûf-ı teba‘a-i Devlet-i aliyyemin her hâlde istikmâl-i huzûr ve râhatları matlûb ve mültezem eylediğinden ol vechile icrâsı husûsuna irâde-i aliyyem müte‘allik ve şeref-sudûr olmuş olmağın mûcebince ruhsatı hâvî işbu emr-i şerîfim ısdâr ve i‘tâ olundu. Siz ki şehremîni ve mevlânâ-yı müşârün-ileyhâsız, keyfiyet ma‘lûmunuz oldukda husûs-ı mezbûru bi’l-cümle esnâf vesâir lâzım gelenlere i‘lân ile bâlâda beyân olunduğu üzere pazar-ı mezkûrun beher hafta Pazarertesi günlerinde müceddeden küşâdı husûsuna mübâderet eyleyesiz. Tahrîren fî 11 Rebî‘ülevvel sene [1]283.