İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 74 Hüküm no: 25 Orijinal metin no: [12-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum çocukları için kilise avlusunda mekteb yapılmasına ruhsat verilmesi Rum çocukları için mekteb inşâsına fermân Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûri bi’l-fikri’s-sâkıb mütemmimü mehâmü’l-enâmi bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sunûf-i avâtıfi’l-meliki’l-a‘lâ e‘âzım-i vüzerâ-yı saltanat-ı seniyyemden Dersa‘âdet’im zabtiye müşîri olup birinci rütbe-i Osmânî ve Mecîdî ve imtiyâz nişân-ı zî-şânlarını hâiz ve hâmil olan vezîr-i dirâyet-semîrim Mehmed Emin Paşa -edâmallâhu te‘âlâ iclâlehû- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezailehû- tevkī‘-i refî‘-i hümâyûnum vâsıl olucak ma‘lûm ola ki, Fenârkapısı civârında Kiremit mahallesinde mütemekkin Rum teba‘a-i şâhânem etfâlinin ta‘lîm ve ta‘allümleri için kilise havlusu derûnuna müceddeden bir bâb mekteb binâ ve inşâsına müsâ‘ade-i seniyyem erzân kılınması Rum Patrikhânesi tarafından bâ-takrîr inhâ ve istid‘â olunmuş ve keyfiyet Nâfi‘a Nezâreti’ne lede’l-havâle mahâll-i mezkûra me’mûr-ı mahsûsa irsâliyle keşf ve mu‘âyene ettirildikde inşâ olunacak mekteb [13] bi-hesâb-ı terbî‘î iki yüz altı arşın altı parmakdan ibâret olduğu ve altı arşın irtifâ‘ında ve on arşın arzında ve yirmi arşın on beş parmak tûlünde olarak kilise-yi mezbûr havlusuna inşâ olunacağı ve inşâsında mahâllince mahzûr ve mazarrât olmadığı tebeyyün ve tahakkuk etmiş idiği nezâret-i müşârün-ileyhâ tarafından ifâde ve inbâ ve ol bâbda tanzîm ettirilen harîtası dahi takdîm [ve] isrâ kılınmış olduğundan keyfiyet taraf-ı eşref-i pâdişâhâneme arz ile lede’l-istîzân ol vechile binâ ve inşâsına müsâ‘ade-i seniyye-i mülûkânem erzân kılınarak emr-i hümâyûn-ı şâhânem sünûh ve sudûr eylemiş olmağın mûcebince ruhsatı hâvî Dîvân-ı hümâyûnumdan işbu mazbata? ısdâr ve harîta-i mezbûr ile beraber i‘tâ olundu, siz ki müşîr-i müşâr ve mevlânâ-yı mûmâ-ileyhimâsız, fi’l-hakīka mekteb-i mezbûrun kilise havlusu derûnuna inşâsında bir gûne mahzûr ve mazarrât olmadığı hâlde beyân olunan tûl ve arz ve kaddi zirâ‘larını tecâvüz etmemek ve harîta-i mezbûre mûcebince inşâ kılınmak üzere irâe-i ruhsat olunması ve bundan dolayı kimesneye bir akçe ve bir habbe aldırılmaması husûslarına mübâderet ve hilâfından tevakkī ve mübâderet [mübâ‘adet] eyleyesiz. Tahrîren fî 6 Cumâdelâhire sene 1283.