İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 78 Hüküm no: 30 Orijinal metin no: [14-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Mustafa Paşa mahallesinde Perşembe günleri pazar kurulmasına ruhsat verildiği Küçük Mustafa Paşa’da pazar küşâdına dâir fermân-ı âlî İftihârü’l-e‘âlî ve’l-e‘âzım muhtârü’l-ekâbir ve’l-efâhim müstecmi‘u cemî‘i’l-ma‘âlî ve’l-mekârim el-muhtassu bi-mezîd-i inâyeti’l-meliki’d-dâim e‘âzım-i ricâl-i Devlet-i aliyyemden kethudâ-yı mehd-ulyâ-yı saltanat-ı seniyyem ve şehremîni olup birinci rütbe-i Osmânî ve ikinci rütbe-i Mecîdî nişân-ı zî-şânlarının hâiz ve hâmili Hüseyin Bey -dâme ulüvvuhû- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în hâlâ İstanbul kādısı ve Mecîdîye nişân-ı zî-şânının üçüncü rütbesinin hâiz ve hâmili Uryânîzâde Mevlânâ Ahmed Es‘ad Efendi -zîdet fezailehû- tevkī‘-i refî‘-i hümâyûnum vâsıl olucak ma‘lûm oldur ki, Gül Câmi‘-i şerîfi civârında Küçük Mustafa Paşa mahallesinde mukaddemâ Cuma günleri açılmakda iken ta‘tîl edilen pazarın yeniden beher hafta Perşembe günlerinde küşâdı husûsuna müsâ‘ade-i aliyyem erzân ve şâyân kılınması civâr-ı mahallât ahâlîsi taraflarından bâ-arzuhâl istid‘â ve istirhâm olunmuş ve keyfiyet Mâliye Nezâret-i celîlesi cânibinden dahi bâ-takrîr ifâde kılınmış olup beyâna hâcet olmadığı üzere kâffe-i memâlik-i mahrûse-i şâhânemde ve husûsuyla Dârü’l-hılâfeti’l-aliyyemde sâkin ve mutavattın teba‘a-i Devlet-i aliyyemin her hâlde istikmâl-i huzûr ve râhatları matlûb ve mültezem idiğinden ol vechile icrâsı husûsuna irâde-i aliyyem müte‘allik eylemiş olmağın mûcebince ruhsatı hâvî işbu emr-i şerîfim ısdâr ve i‘tâ olundu. Siz ki şehremîni ve mevlânâ-yı müşârün-ileyhâsız, keyfiyet ma‘lûmunuz oldukda husûs-ı mezkûru bi’l-cümle esnâf vesâir lâzım gelenlere i‘lân ile bâlâda beyân olunduğu üzere pazar-ı mezkûrun beher hafta Perşembe günlerinde küşâdı husûsuna mübâderet eyleyesiz, şöyle bilesiz, alâmet-i şerîfe i‘timâd kılasız. Tahrîren fî 21 Safer sene [1]284.