İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 80 Hüküm no: 33 Orijinal metin no: [15-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazineye borçları olma ihtimalinden dolayı özellikle sarraf ve ailelerinin tasarrufunda bulunan emlak, değirmen ve fırın gibi malların satışında maliyeden sorulmadan işlem yapılmaması 173 Ma‘rûz-ı âlî-i hazret-i Meşîhat-penâhîye Ma‘rûz-ı bende-i dîrîneleridir ki, Bi’l-cümle evkāf-ı şerîfe musakkafât ve müstagallâtından ferâğ ve intikāl ve fekk-i istiğlâl ve mahlûl vukū‘unda evvelâ emlâk idâresi defterlerinde vukū‘âtı yürüdülüp dâhil olduğu esvâk ile numaralarını mübeyyin ilmühaberleri verildiğinden sonra îcâbâtının icrâsı ve sarrâfân ile familyaları üstünde bulunan emlâk ve akār ile değirmen ve fırınların hîn-i ferâğ ve intikālinde ashâbının cihet-i kefâlet vesâireden dolayı hazîne-i celîleye bir gûne zimmetleri olup olmadığını nizâmına tevfîkan evvel-emirde nezâret-i celîle-i Mâliye’den istifsâr ile onun üzerine mu‘âmelâtın îfâsı usûl-i müttehaze iktizâsından ise de zimmet-i mîrîyeleri bulunmak mülâbesesiyle hazînece ferâğ ve intikāli icrâ kılınmayan mahaller ashâbı ibtidâ Tahrîr İdâresi’ne mürâca‘atla kaydlarını tashîh ettirerek ilmühaber ahz etmiş bulunduklarından bu hâl hem kuyûd-ı emlâkin teşvîşini ve hem de emvâl-i hazînenin te’hirât ve müşkilâta dûçâr olunması müeddî olunduğuna ve Tahrîr İdâresi nezâret-i müşârün-ileyhâya ilâve olunmuş olmasıyla bundan böyle ilmühaber ahzı zımnında idâre-i mezkûreye mürâca‘at olundukda senedinde sarrâf ve müte‘allikātı ve değirmen ve fırın lafızları musarrah olan veyâhûd siyâk ve sibâkdan anlaşılan emlâk ashâbının hazîne-i celîleye zimetleri olup olmadığı bi’t-tahkīk ba‘dehû senedât odasınca iktizâsı îfâ olunmak üzere verilecek ilmühaberlerin mülâhazât hanelerinde gösterilmesi sühûleti ve tasarruf-ı emlâki te’mîn eden kuyûdun teşvîşden vikāyesini mûcib olacağına binâen bu sûretin usûl ittihâzı ve bir de sarrâfân ve tüccâr vesâirenin birbirlerindeki alacaklarında ve ba‘zı me’mûrun zimmet-i mîrîyelerinden dolayı uhdelerinde bulunan emlâkin sekvestro altına alınması zımnında Bâbıâlî ile devâir-i resmiyeden teblîgāt vukū‘ bulmakda ise de sekvestro ettirilecek mahallerin mülk veyâhûd vakıf olacağı ve vakıf ise kangı vakıf dâhilinde idiği tasrîh olunmamak hasebiyle kayıdları bulunarak tesviye-i îcâbı mümkün olamayıp tekrar istifsâra mecbûriyet hâsıl olmakda ve ekseriyâ bunların vakıfları tahkīk olunduğu cevâbı alınarak işler müşkilâta düşmekde bulunacağından ve sekvestro ettirilecek mahallerin kangı sokakda bulunduğu numaraları Tahrîr-i Emlâk Odası’na bildirildiği hâlde der-akab kayıdları bâlâsına şerh verileceği ve her ne vakit ashâbı ferâğ ve intikālini icrâ ettirmek murâd etseler behemehâl idâre-i mezkûreye mürâca‘at edecekleri cihetlerle müşkilât-ı vâkı‘aya mahâl kalmayacağından elân sekvestro altında bulunanlar hâliyle kalmak üzere ba‘de ezîn işbu sekvestro maddesinin dahi idâre-i mezkûre ma‘rifeti ile icrâsı husûsları Evkāf-ı hümâyûn nezâret-i celîlesi cânibinden vukū‘ bulan iş‘âr ve ifâde ve nezâret-i celîle-i müşârün-ileyhâ ile cereyân eden muhâbere üzerine Meclis-i Vâlâ’da ve nezd-i senâverîde tensîb edilmiş ve keyfiyet nezâret-i müşârün-ileyhâ ile sâir iktizâ eden mahâl ve devâire havâle ve iş‘âr olunduğu gibi Bâbıâlîce îcâb eden aklâma da ma‘lûmât verilmiş olmağın taraf-ı âlî-i hazret-i Fetvâ-penâhîlerinden iktizâ-yı hâlin icrâsı bâbında emr ü fermân hazret-i men-lehu’l-emrindir. Fî 24 Receb sene [1]284 ve fî 9 Teşrîn-i sânî sene [12]83.