İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 89 Hüküm no: 42 Orijinal metin no: [20-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya’da Katolik kız mektebi inşasına izin verildiği Kız mektebi inşâsına emr-i âlî Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûri bi’l-fikri’s-sâkıb mütemmimü mehâmü’l-enâmi bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sunûf-i avâtıfi’l-meliki’l-a‘lâ Dersa‘âdet’im zabtiye müşîri olup birinci rütbe-i Mecîdîye nişân-ı zî-şânını hâiz ve hâmil olan vezîrim Hüsnü Paşa -edâmallâhu te‘âlâ iclâlehû- akzâ kuzâtü’l-Müslimîn [evlâ] vülâti’l-muvahhidîn ma‘denü’l-kazâ [fazl] ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kādısı -zîdet fezailehû- tevkī‘-i refî‘-i hümâyûnum vâsıl olucak ma‘lûm oldur ki, seyyidetü’l-muhadderât iklîletü’l-muhassenât tâcü’l-mestûrât safiyyetü’s-sıfât refî‘atü’d-derecât olan zâtü’l-aliyyü ve’s-sa‘âdet vâlidem Sultân’ın -dâmet ismetuhâ ve zâdet iffetuhâ- nâmına olarak bir Katolik kız mektebi inşâsını mütehayyizân-ı ricâl-i Devlet-i aliyyemden ve Şûrâ-yı Devlet a‘zâsından olup ikinci rütbe-i Osmânî nişân-ı hümâyûnumla dördüncü rütbe-i Mecîdî nişân-ı zî-şânını hâiz ve hâmil olan iftihârü’l-a‘lâ ve’l-a‘zam Bogos Sabri Bey -dâme ulüvvuhû- emel ve arzu eylediğinden ol bâbda müsâ‘ade-i seniyyem erzân kılınması millet-i merkūme patriği ile mîr-i müşârün-ileyh tarafından başka başka takrîr takdîmiyle istid‘â olunmuş ve keyfiyet taraf-ı şevket-i pâdişâhâneme arz ile lede’l-istîzân mekteb-i mezbûrun binâ ve inşâsına müsâ‘ade-i seniyye-i mülûkânem <<üzere>> erzân kılınarak emr-i hümâyûn-ı şevket-makrûn-ı pâdişâhânem sunûh ve sudûr eylemiş olmağın muktezâ-yı münîfi üzere ruhsatı hâvî Dîvân-ı hümâyûnumdan işbu emr-i celîlü’l-kadrim ısdâr ve i‘tâ olundu, siz ki müşîr-i müşâr ve mevlânâ-yı mûmâ-ileyhâsız, keyfiyet ma‘lûmunuz oldukda mekteb-i mezbûrun Samatya’da bir münâsib mahâlde usûlüne tevfîkan binâ inşâsına hiç bir tarafdan müdâhale ve mümâna‘at olunmaması irâde-i seniyye-i mülûkânem muktezâsından olmağla ber-vech-i muharrer amel ü hareket ve hilâfından tevakkī ve mübâ‘adet eyleyesiz. Fî 6 Rebî‘ülâhir sene [12]85.