İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 90 Hüküm no: 45 Orijinal metin no: [21-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gediklerin satılması sırasında kalemde kalan ruhsat tezkiresi koçanlarının Tahrir İdaresi’ne iade edilmesi İstanbul Kādılığı cânib-i vâlâsına Fazîletlü efendim hazretleri, Bâ-hüccet tasarruf olunan ve kat‘iyen mübâya‘ası ve hasebi’l-verâse intikāli dâire-i aliyyelerinde icrâ olunan gedikler için Tahrîr İdâresi’nden verilmekde olan ruhsat tezkirelerinin kalemde kalan koçanları mûcebince vukū‘âtı yürüdülmekde ise de bunların ba‘zısı muahharan pazarlıkdan vesâir esbâbından dolayı ahkâmı icrâ olunamayıp bâyi‘ ve müşterinin yedlerinde kalması cihetiyle emlâk defterlerinin mu‘âmele-i kuyûdiyesi müşevveş kaldığından ba‘demâ dâire-i mezkûreden verilecek tezâkire bey‘ olunacak veyâhûd intikāl eyleyecek gediklerin yalnız kimin uhdesinde bulunduğu ashâb-ı emlâk hânesine tahrîr ve işâret olunacağından bu tezkirelerin İstanbul mehâkimince mu‘âmelesi icrâ olundukdan ya‘ni o tezkirelerin şâmil olduğu gediklerin kimin uhdesine geçdiği müşteri ya‘ni mefrûğun-leh hânesine yazıldıkdan sonra hıfz edilerek her haftada bir kere terâküm eden tezâkirin vukū‘âtı yürüdülmek ve kalemde olan koçanları doldurulmak üzere dâire-i mezkûreye behemehâl i‘âdesi zımnında iktizâ edenlere tenbîhât-ı mukteziye icrâsı bâbında emr ü irâde efendim hazretlerinindir. Fî 10 Şevval sene [12]85 ve fî 11 Kânûn-ı sânî sene [12]84. Rüşdü [22. sayfa boştur]