İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 91 Hüküm no: 46 Orijinal metin no: [23-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dürrizade Mehmed Dürrî Efendi’nin İstanbul Kadılığı’na tayini İstanbul Kādısı Dürrîzâde fazîletlü Dürrî Efendi hazretlerinin zamân-ı âlîleri fermân sicilli, fî- gurreti Şevval sene 1285 İstanbul kādılığı fermânı Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul pâyelülerinden olup Mecîdî nişân-ı zî-şânının ikinci rütbesini hâiz [ve] hâmil olan Dürrîzâde Mevlânâ es-Seyyid Mehmed Dürrî Efendi -zîdet fezailehû- tevkī‘-i refî‘-i hümâyûnum vâsıl olucak ma‘lûm ola ki, sen ki mevlânâ-yı mûmâ-ileyhsin, sen akrân ve emsâlin beyninde gevher-i ilm ve fazl ile mütehallî ve mevsûf olup her vechile sezâvâr-ı inâyet ve şâyeste-i mekremet olduğuna mebnî işbu bin iki yüz seksen beş senesi şehr-i Şevvali’l-mükerremi gurresinden zabtetmek üzere İstanbul kazâsının uhdene tevcîh ve ihsân kılınması husûsunu bi’l-fi‘il şeyhülislâm ve müfti’l-enâm olup murassa‘ nişân-ı Osmânî ile Mecîdî nişân-ı zî-şânının birinci rütbesini hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazl ve’l-yakīn hoca-i şehriyârânem mevlânâ Hasan Fehmi Efendi -edâmallâhu teâlâ fezâilehû- telhîs etmeleriyle mûcebince hakkınız[d]a mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânemden şeref-efzâ-yı sünûh ve sudûr olan emr-i hümâyûn-ı şevket-makrûn-ı şâhânem muktezâ-yı münîfi üzere zikrolunan İstanbul kazâsının uhdene tevcîh olunduğunu mutazammın işbu fermân-ı celîlü’l-unvân-ı pâdişâhânem ısdâr ve i‘tâ olundu. Sâlifü’z-zikr İstanbul kazâsına gurre-i merkūmede mutasarrıf olup icrâ-yı ahkâm-ı şer‘at-ı nebeviyeye bezl-i makadûr ve sa‘y-i mevfûr eyleyesin. Tahrîren fi’l-yevmi’s-sâlis ve’l-işrîn min-şehri Ramazani’l-mübârek li-sene hamse ve semânîn ve mieteyn ve elf.