İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 92 Hüküm no: 47 Orijinal metin no: [23-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Prusya, Nederland ve Danimarka devletleri tebalarının da Osmanlı Devleti’nde emlak tasarruf edebilecekleri Numara 290-8 Ma‘rûz Memâlik-i mahrûse-i hazret-i şâhânede teba‘a-i ecnebiyenin tasarruf-ı emlâk etmeleri hakkında cârî olan memnû‘iyetin def‘iyle emlâk hakkında teba‘a-i saltanat-ı seniyyenin nâil oldukları hukūka bunların îfâ ettikleri vezâif ile mükellef olmak şart-ı esâsî ve şurût-ı sâire ile nâil olmalarına bi’l-müsâ‘ade ol bâbda yapılmış olan kānûnnâme-i hümâyûn işbu hukūka nâil oldukları hâlde memâlik-i şâhânede bulunacak ecânib hakkında cereyân etmesi lâzım gelen mu‘âmelâtı mutazammın olup devletlerin kabûl ve imzâlarına ta‘lîkan imlâ ve tenmîk kılınmış olan mazbata-i resmiyenin suver-i matbû‘ası mukaddemâ neşr ü i‘lân kılınmış idi. Zikrolunan mazbatanın ahkâm-ı mündericesini bu def‘a Prusya ve Nederland ve Danimarka devletleri dahi tamamıyla kabûl ederek işbu mazbata taraf-ı senâverî ile düvel-i müşârün-ileyhin Dersa‘âdet’de mukīm sefâretleri beyninde bu kerre imzâ ve te‘âtî olunmakla karâr-ı mezkûrun Prusya ve Nederland ve Danimarka devletleri teba‘ası haklarında dahi mütesâviyen icrâ ettirilmesi lâzım gelmiş olmağın fî 20 R sene [12]85 târihiyle yazılan tezkire-i senâverî mündericâtına tevfîkan mu‘âmele olunması ve fakat bunların mazbata-i merkūmeyi henüz kabûl etmemiş olan devletler teb‘âsından tefrîki zımnında Dersa‘âdet’de bulunan sefâretlerinden birer takrîr istihsâl ve Hâriciye Kitâbet-i behiyesinden bu takrîrleri resmen tasdîk ettirdikden sonra iktizâ eden devâire mürâca‘at etmeleri hakkında ittihâz olunan usûl kemâ-kân bâkī olmağın ol bâbda emr ü irâde hazret-i men-lehu’l-emrindir. Fî 24 Rebî‘ülevvel sene [1]286, fî 23 Haziran sene [1]285.