İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 98 Hüküm no: 60 Orijinal metin no: [29-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emlakın rehin verilmesi hususundaki davalarda yeni kaleme alınan hükümlere göre karar verilmesi Numara 122 Cânib-i vâlâ-yı cenâb-ı Meşîhat-penâhîye Ma‘rûz-ı bende-i dîrîneleridir ki, Ba‘zı medyûnlar mutasarrıf olduğu bir mülkü bir kaç alacaklıya terhîn etmekde ve bundan dolayı envâ‘-ı müşkilât ve münâza‘ât tahaddüs eylemekde olduğu ba‘zı mahallerden vâki‘ olan iş‘ârâtdan anlaşılmış ve müsakkafât ve müstagallât-ı vakfiyenin sûret-i istiğlâli bir kā‘ide-i mazbûta tahtında cârî ise de emlâk-i sâirenin mu‘âmelât-ı terhîniyesinde intizâm ve inzibât olmamış bi’t-tab‘ bir takım sûisti‘mâlâtı dâ‘î olacağından bunun dahi mûcib-i emniyet olacak bir kā‘ide tahtına vaz‘ı lâzımeden bulunmuş olmağla ol bâbda Şûrâ-yı Devlet’den kaleme alınıp bi’l-istîzân icrâ-yı ahkâmı hakkında irâde-i seniyye-i hazret-i pâdişâhî şeref-müte‘allik etmiş olan mevâdd-ı nizâmiyenin bir nüsha-i musaddakası leffen tesyîr-i savb-ı vâlâ-yı Meşîhat-penâhîleri kılınmış olmağla muktezâsı üzere mu‘âmele etmeleri zımnında îcâb eden hükkâm ve nüvvâb-ı şer‘iyeye teblîgāt icrâsına himem-i aliyye-i Fetvâ-penâhîleri masrûf buyurulmak bâbında emr ü irâde hazret-i men-lehu’l-emrindir. Fî 3 Cumâdelûlâ sene [1]287, fî 20 Temmuz sene [12]86. [30] Terhîn-i emlâk hakkında mevâdd-ı nizâmiyedir Birinci madde: Bir mülkün terhîninde ibtidâ o mülkün başka yere terhîn edilmek ve sekvestro tahtında bulunmak gibi ilişiği olmadığını musaddak mahalle veyâ karyesi muhtârı ve ihtiyâr meclisi tarafından memhûr bir ilmühaber ahz ile re’s-i livâda Meclis-i Temyîz’e ve kazâda ise De‘âvî Meclisi’ne ibrâz olunacak ve meclisde bilâ-te’hîr o mülkün senedâtı mu‘âyene ve bir gûnâ ilişiği olmadığı tahkīk olundukdan sonra ilmühaberi hıfz olunarak bir ruhsatnâme verilip o ruhsatnâme mülkün bulunduğu kazâ mahkeme-i şer‘iyesine bi’l-irâe oradan rehin hücceti alınmak lâzım gelecekdir. İkinci madde: De‘âvî ve temyîz mecâlisinde mu‘âmelât-ı terhîne için bir defter tutulup bir mülk hakkında terhîn ruhsatnâmesi verildiği anda o deftere kaydolunacak ve rehinin hîn-i fekkinde mecâlis-i mezbûreye bi’l-mürâca‘a kaydı tashîh ettirilecekdir. Üçüncü madde: Bu mu‘âmelâtın icrâsına ihtiyâr ve de‘âvî ve temyîz mecâlisinden harc ve resm alınmayıp yalnız hüccet harcı alınacakdır. Fî 21 Rebî‘ülâhir sene [1]287, fî 8 Temmuz sene [12]86.