İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 100 Hüküm no: 62 Orijinal metin no: [30-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yabancıların emlak sahibi olması kanunu hükümlerini İspanya’nın da kabul etmesiyle vatandaşlarının emlak sahibi olacakları Taraf-ı vâlâ-yı Meşîhat-penâhîye Ma‘rûz-ı bende-i dîrîneleridir ki, Memâlik-i mahrûse-i hazret-i şâhânede teba‘a-i ecnebiyenin tasarruf-ı emlâk etmeleri hakkında cârî olan memnû‘iyetin ref‘iyle emlâk hakkında teba‘a-i saltanat-ı seniyyenin nâil oldukları hukūka bunların îfâ ettikleri vezâif ile mükellef olmak şart-ı esâsîsi ve şurût-ı sâire ile nâil olmalarına bi’l-müsâ‘ade ol bâbda yapılmış olan kānûnnâme-i hümâyûn işbu hukūka nâil oldukları hâlde memâlik-i şâhânede bulunacak ecânib hakkında cereyân etmesi lâzım gelen mu‘âmelâtı mutazammın olup devletlerin kabûl ve imzâlarına ta‘lîkan imlâ ve tenmîk kılınmış olan mazbata-i resmiyenin suver-i matbû‘ası mukaddemâ neşr ve i‘lân kılınmış idi. Zikrolunan mazbatanın ahkâm-ı mündericesini bu def‘a İspanya devleti dahi tamamıyla kabûl ederek işbu mazbata taraf-ı âcizî ile sefâret beyninde bu kerre imzâ ve te‘âtî olunmağla karâr-ı mezkûrun devlet-i müşârün-ileyhâ teba‘ası haklarında dahi mütesâviyen icrâ ettirilmesi lâzım gelmiş olmağın fî 20 Rebî‘ülâhire sene [1]285 târihiyle tastîr kılınan buyruldu-yı âcizîde bast ve temhîr kılınan vesâyâ vechile mu‘âmele olunması ve fakat bunların mazbata-i merkūmeyi henüz kabûl etmemiş olan devletler teba‘asından tefrîki zımnında Dersa‘âdet’de bulunan sefaretden birer takrîr istihsâl ve Hâriciye Kitâbet-i behiyesinden bu takrîrleri resmen tasdîk ettirdikden sonra iktizâ eden devâire mürâca‘at etmeleri hakkında ittihâz olunan usûl kemâ-kân bâkī olduğu beyânıyla tezkire-i âcizî terkīm kılındı ol bâbda emr ü fermân hazret-i men-lehu’l-emrindir. Fî 28 Receb sene [1]287, fî 11 Teşrîn-i evvel sene [1]286.