İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 103 Hüküm no: 68 Orijinal metin no: [34-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski ölçülerin yeni ölçülere ne zaman ve ne şekilde çevrileceğine dair kanuna göre hareket edilmesi Mesâhât, ekyâl ve evzân-ı atîkanın tebdîli ile ilgili Numara 61 Taraf-ı âlî-yi Meşîhat-penâhîye Ma‘rûz-ı bende-i dîrîneleridir ki, Beyâna hâcet olmadığı vechile mikyâsât-ı cedîdeye dâir neşr ve i‘lân olunmuş olan kānûnnâme-i hümâyûnun onuncu maddesinde seksen yedi senesinden doksan senesi Mart’ına değin mesâhât ve ekyâl ve evzân-ı atîkanın ahâlîce isti‘mâli muhayyer olup fakat bu müddet içinde tanzîm olunacak olan her türlü mukāvele senedâtında isti‘mâl olunan atîk mikyâsların yeni mikyâslara tahmîliyle işbu yeni mikyâsların dahi derci mecbûrî olacağı ve bu müddet zarfında akdolunup icrâsı doksan senesi Martı’ndan sonraya mu‘allak olan mukāvele senedâtında mesâhât ve ekyâl ve evzân-ı atîkanın derci câiz olmayacağı ve yine cedîd mikyâsların tatbîk ve mu‘ayenesine dâir olan nizâmnâmenin otuz ikinci maddesinde dahi kānûnnâme-i mezkûrun onuncu ve on birinci maddeleri ahkâmına mugāyir her nevi‘ i‘lânât ve senedât ve defâtir tanzîm edenler ve evzân ve ekyâl ve mesâhât isti‘mâl eyleyenler haklarında cezâ kānûnnâme-i hümâyûnunun iki yüz altmış ikinci maddesi hükmüne tatbîkan mücâzât olunacağı ve otuz üçüncü maddesince dahi madde-i sâbıkada beyân olunan her nevi‘ i‘lânât ve senedât ve defâtirin mugāyir-i kānûn olarak tanzîm olunmasından dolayı hükmolunacak cezâ-i nakdîler ahz ve istifâ olunmadıkça işbu evrâka mehâkim ve mecâlisde mu‘teber tutulmayacağı münderic ve mastûr olup muahharan her tarafa bildirilmiş olduğu vechile bu usûle sâl-i hâl-i Haziran’dan i‘tibâren bed’ olunması mukarrer idiğine ve eğerçi doksan senesi Mart’ına kadar herkes evrâk-ı mezkûrede eski mikyâsları derc ve tahrîrde muhayyer ise de bunların derc ve tahrîrinde mikdârlarının mikyâsât-ı cedîdeye dahi nakl ve tahvîl ile mikyâsât-ı cedîdenin bi-eyyi hâl derc ve tasrîh edilmesi lâzım geleceğine binâen bundan böyle tanzîm olunacak evrâk ve senedâtın zikrolunan nizâmnâmenin otuz üçüncü maddesi mûcebince hareket olunmasının mehâkim ve idâre mecâlisine teblîği bu kerre Dîvân-ı Ahkâm-ı Adliye Nezâret-i celîlesinden bâ-takrîr ifâde olunmuş ve sûret-i hâl bu kerre devâir-i sâireye bildirildiği misillü bi’l-cümle vilâyâta dahi iş‘âr edilmiş olmağın ber-vech-i muharrer iktizâsının îfâsı bâbında emr ü irâde hazret-i veliyyü’l-emrindir. Fî 28 Rebî‘ülevvel sene [1]288, fî 5 Haziran sene [12]87.