İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 104 Hüküm no: 69 Orijinal metin no: [34M-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evrak-ı sahiha nizamı hükümlerine uyulması, uymayanların cezalandırılacağı Hâlâ Dârü’l-hilâfeti’l-aliyye kādısı Mektûbî Rıza Efendizâde fazîletlü es-Seyyid Mehmed Şemseddin Efendi hazretlerinin zamân-ı âlîleri. Fî-gurreti Şevval sene 1288. Evrâk-ı sahîhe hakkında Sûret-i i‘lânnâme Evrâk-ı sahîha hakkında mukaddemâ i‘lân ile herkese bildirilmiş olan nizâmın icrâ-yı ahkâmına ba‘zılar tarafından lâyıkıyla dikkat olunmadığı mehâkim ve mecâlise ibrâz olunan senedât ve evrâk-ı sâirelerinden müstebân olarak böyleler hakkında eğerçi nizâm-ı mezkûrun ta‘yîn eylediği mu‘âmele-i cezâiye mukarrer ise de bir kerre daha i‘lân-ı nizâm-ı mukarrere ibtidâr kılınır. Şöyle ki her nevi‘ ikrâz ve istikrâz ve şirket ve mukāvelât ve ta‘ahhüdât ve ahz ü i‘tâ mu‘âmelâtında alınıp verilecek ve’l-hâsıl mehâkim ve mecâlis-i Devlet-i aliyyede li-ecli’l-ihticâc ibrâz edilebilecek kâffe-i senedât ile makbûz ve poliçe ve bono senedleri ve kumpanyaların hisse senedleri âdî kâğıd veyâhûd nizâmen iktizâ eden cinsden gayrı bir varaka-i mahsûsa üzerine yazılmış olarak da‘vâ ile mehâkim ve mecâlise vesâir hükûmet mahalleriyle mâl ve hükûmet me’mûrlarına ve lonca odalarına gelir ise veyâhûd sâir esbâb ve vesâil ile hükûmetin eline geçirilir ise nizâmı vechile zabt ve tevkīf ile haklarında nizâmın gösterdiği mu‘âmele-i cezâiye icrâ edilmedikçe da‘vâya bakılmaması ve öyle senedin sahibine verilmemesi husûsu bu kerre bi’l-cümle mehâkim ve mecâlis ve me’mûrîne te’kîd kılınmış olmağla herkes bu te’kîdi bilip ona göre hareket ile ahkâm-ı mebsûta-i nizâmiyeyi vaktiyle yerine getirmeye i‘tinâ ve dikkat eylemek üzere cümleye ihtâr-ı keyfiyete ibtidâr olunmuşdur ve bono ve poliçeler hakkında eksik teshîlât var ise o dahi ikmâl ve teshîl kılınacakdır. Fî 5 Zilka‘de sene 1288 ve fî 4 Kânûn-ı sânî sene [12]87.