İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 110 Hüküm no: 74 Orijinal metin no: [37-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahkemelerden verilen ilâmlarda davacı ve davalının isimleriyle diğer bilgilerinin yazılması hususuna dikkat edilmesi Mahkeme i‘lâm ve senedâtının yazılma usûlü İstanbul Bâb Mahkemesi’ne Taraf-ı âlî-yi Meşîhat-penâhîlerinden Dersa‘âdet ve bilâd-ı selâsede bulunan bi’l-cümle mehâkim-i şer‘iyede hukūka dâir tanzîm ve i‘tâ olunan i‘lâmâtda müdde‘î ve müdde‘â-aleyhin isim ve şöhretleri ba‘zan yazılmakda ise de ekserîsinde buna dâir sarâhat olmadığından ba‘de ezîn verilecek i‘lâmâtın tenfîz-i ahkâmı ve mücerred teshîl ve teşrî‘-i mu‘âmelâtı mûcib olmak üzere herbirinde usûlüne tevfîkan müdde‘î ve müdde‘â-aleyhin isim ve şöhretleriyle bulundukları sınıf ve sâkin oldukları mahalle ve çarşının ve mümkün olduğu hâlde hâne ve dükkân numarasının derc ve tasrîh edilmesi İcrâ Cem‘iyeti’nden vukū‘ bulan inhâ üzerine îfâ-yı muktezâsı Dîvân-ı Ahkâm-ı Adliye Nezâret-i celîlesinden bâ-tezkirei-i mahsûsa beyân buyurulmuş olmağla ba‘de’l-yevm mehâkim-i şer‘iyeden hukūka vesâire dâir verilecek bi’l-cümle senedât-ı şer‘iyede ahad-i tarafeynden herbiri hakkında îzâhât-ı lâzıme-i mebhûsenin derc ve tasrîh olunması zımnında işbu tenbîhnâme-i mahsûsa tesyîr kılınmışdır. Fî 20 Muharrem sene 1289.