İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 111 Hüküm no: 76 Orijinal metin no: [37-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eshâm-ı âdîlerin eshâm-ı cedîde ne şekilde tebdil edileceğii İ‘lân-ı mahsûs Bâbıâlî cânib-i sâmîsinden son def‘a neşr buyrulan i‘lânnâmenin dördüncü fıkrasında eski eshâm ashâbı sehimlerini eshâm-ı cedîdeye tahvîl etmek istedikleri hâlde fâiz-i senevîsinden yüzde otuzunu terk ederek tebdîl edebilecekleri ve buna dâir ittihâz olunan usûl-i mahsûsanın Mâliye Nezâret-i celîlesinden beyân olunacağı münderic bulunduğundan o yolda eshâm-ı âdiye ile mukāta‘atın eshâm-ı cedîdeye tebdîli zikrolunan i‘lânnâme mûcebince fâizinden yüzde otuz tenzîliyle icrâ olunur bir karın evlâda intikāli meşrût bulunan eshâmdan sehim-i cedîde tebdîli arzu olunur ise kezâlik fâizinden yüzde yirmi beş tenkīsiyle îfâ kılınır. İmtiyâzlı ya‘ni hal vukū‘unda nısfı evlâda kalıp nısf-ı diğeri hazîneye âid olan eshâmdan dahi evvelce sehim-i âdîden şu imtiyâzlı sehim tebdîl olunmuş bulunanlardan yüzde yirmi ve akçesiyle almış olanlar için yüzde yirmi beş tenzîl ile mübâdele edilir ve bunların üç cinsi de sehim-i cedîdi akçe verip alanlar gibi imtiyâza nâil olur. Şöyle ki sahib-i sehim emr-i hak vâki‘ oldukda erkek ve kız evlâdı var ise ona, olmadığı hâlde erkek evlâdının evlâdına, onlar dahi olmadığı sûretde babaya ve anaya, bunlardan birisi yoğise zevc ve zevceye mütesâviyen intikāl eder ve eğerçi evlâdı ve evlâdının evlâdı ve babası ve anası ve hatun ise kocası ve erkek ise karısı olmaz da kimsesiz olarak vefât eder ise ol hâlde mahlûl kalır. Şu kadar ki bu sehimlerin fâizi eshâm-ı cedîde gibi yirmi guruşa beyâz mecîdiye olarak verilmeyip zâten metelik akçe ile alınmış bulunduğu cihetle yine metelik olarak i‘tâ kılınır. Fî 21 Mart sene [1]288.