İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 112 Hüküm no: 77 Orijinal metin no: [37-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emvâl-i eytâm kısmeti görevine Ahmed Bahai Efendi’nin, yardımcılığına da Mehmed Tahir Efendi’nin getirilmesi Muhât-ıttılâ‘-ı hakāyık-ittibâ‘-ı Fetvâ-penâhî buyrulduğu üzere mine’l-kadîm kazzâz ve fesci ve tütüncü ve ekmekçi vesâir esnâf-ı ma‘lûme terekeleri İstanbul mahkemesinden kısmet-i belediye cânibinden tahrîr ve tesviye olunmak bâ-fermân-ı âlîşân müesses olan nizâm iktizâsından olduğuna ve bu terekeleri tahrîr edecek ketebenin esnâ-yı tahrîr ve tesviye-i muhallefâtda akçe kabzı mu‘âmelâtına dahi tedâhülleri cihetiyle kısmet-i askeriye ketebesi misillü kefâlet-i kaviyye tahtında bulundurulmaları nizâm ve usûl îcâbından bulunduğuna binâen bu yolda îfâ-yı mu‘âmelât olunmakda idiyse de müstahdem ketebenin niyâbet vesâir hidemât-ı şer‘iye ile tebdîl-i me’mûriyet eylemeleri hasebiyle yerlerine istihdâm olunacakların yine sâbıkı gibi kefâlet-i mevsûka ve mu‘temede altına alınması ve emvâl-i eytâmın bu dâirece dahi ale’d-devam emniyet-i tâmme altında bulundurulması muktezâ-yı velâye bulunduğundan ve Kısmet-i Belediye Başkitâbeti müderrisîn-i kirâmdan olup Bab Mahkemesi Başkitâbeti hizmetinde bulunan es-Seyyid Ahmed Bahâî Efendi ve refâkati hizmeti dahi kudâtdan Mehmed Tahir Efendi abd-i dâ‘îleri mihver-i lâyıkıyla ve silk-i sıdk ve emânetde hüsn-i idâreye sarf ve bezl-i iktidâr eylemekde bulundukları cihetle bunlar hasebi’l-usûl müteselsilen kefâlet-i kaviyyeye rabt ve tevsîk olunduklarından kendülerinin sâbık ve nizâmı üzere esnâf-ı merkūme terekelerinin tahrîr ve tesviye-i müteferri‘âtına me’zûniyetleri derciyle ber-mûceb-i nizâm-ı kadîm icrâ-yı mu‘âmelâta dikkat olunmak bâbında ve bir kıt‘a fermân-ı âlî istihsâl buyurulması müsâ‘ade-i aliyye-i hazret-i Fetvâ-penâhîlerine menût ve mevkūf bulunmağın kātıbe-i ahvâlde emr ü fermân hazret-i men-lehu’l-emrindir. Fî 6 Safer sene [12]89.