İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 115 Hüküm no: 85 Orijinal metin no: [42-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazı memurların işe gelmedikleri veya geç gelip erken gittikleri duyulduğundan mesai saatlerine azami dikkat edilmesi Me’mûrların vazîfeye devamı Âzâde-i beyân olduğu üzere bir me’mûr umûr-ı me’mûresine devam ile vezâif-i müterettibesinin tamamıyla îfâsında ibrâz-ı mesâ‘î ve gayret eylediği hâlde cümle indinde memdûh ve makbûl olacağı misillü bi’l-aks tekâsül ve müsâmaha eder ise makdûh ve mesûl olacağına ve ale’l-husûs devâir-i şer‘iye me’mûrları mahâll-i me’mûriyetlerine müdâvemet ve mesâlih-i ibâdın sür‘at-i hüsn-i rü’yet ve cereyânıyla senedât-ı şer‘iyelerinin tanzîm ve i‘tâ ve ashâb-ı mesâlihin vikāye-i mağdûriyetlerine dikkat eylemeleri lâzımeden bulunduğuna mebnî bu bâbda ihtâr ve icrâ-yı vesâyâya hâcet yoğise de olunan rivâyât üzerine Cum‘a’dan mâ‘adâ Pazar ve Çarşamba günleri dahi ba‘zı me’mûrîn ve hademe-i şer‘iyenin gelmedikleri ve ba‘zıları dahi pek geç gelip erken avdet eyledikleri tahkīk edilmiş ve bu ise mugāyir-i rızâ-yı âlî bulunmuş olduğundan ba‘de ezîn büyük ve küçük kâffe-i me’mûrîn-i kirâm ve ketebe ve hademe-i şer‘iye Cum‘alardan mâ‘adâ beher gün sabahleyin nihâyet sâ‘at beş buçukda mahâll-i me’mûriyetlerine gelip ahşam üzeri on buçukdan evvel avdet ve bilâ-özr terk ve ta‘tîl-i hizmet etmemeleri ve bu husûsa rüesâ-yı me’mûrîn-i kirâm taraflarından nezâret ve dikkat-i mütevâliye icrâsıyla mesâlih-i vâkı‘anın ukde-i te’hîre düşürülmemesi matlûb-ı kat‘îdir. İşbu ihtârın hüsn-i te’sîri me’mûl ve muntazır ise de hilâfı zuhûrunda me’mûrîn-i muvazzafanın kıste’l-yevm hesâbiyle tevkīf-i ma‘âşları ve ketebe-i şer‘iyenin da‘vâ zabtettirilmemek gibi tedâbîr-i men‘iyye-i tahzîriye ittihâzını celb etmiş olacakları şimdiden teblîğ ve ihtâr olunur. Târih-i vürûdu fî-gurreti Muharrem sene [12]90.