İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 116 Hüküm no: 86 Orijinal metin no: [42-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmanlı Devleti ile İran Devleti’nde bulunan iki taraf tebasının uyacakları hukuka dair Devletler hukūku Hâriciye Nezâret-i celîlesine Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Saltanat-ı seniyye ile İran Devleti memâlikinde bulunan teba‘a-i tarafeynin hukūk ve mu‘âmelâtının bir kā‘ide-i sâlime tahtına vaz‘ ve idhâliyle zuhûra gelmekde olan ihtilâfât ve müşkilâtın bi-avnihî te‘âlâ bertaraf edilmesi maksad-ı hayr-mirsadına mebnî cinâyâta müte‘allik da‘vâlar ile hukūk-ı şahsiye ve âdiyede vesâir işlerde devleteynin yekdiğeri memâlikinde bulunacak teba‘ası haklarında kendi teba‘aları misillü mu‘âmele olunması husûsunun usûl ittihâzı bu def‘a meclis-i mahsûs karârı üzerine bi’l-istîzân isâbet-efzâ-yı sünûh olan emr ü irâde-i seniyye-i mülûkâne muktezâ-yı âlîsinden bulunmuş ve keyfiyet devâir-i sâire ile bi’l-cümle vilâyete bildirildiği misillü Hâriciye Nezâret-i celîlesinden de Tahran Sefâret-i seniyyesine ve buradaki İran Sefâreti’ne teblîğ kılınmış olmağla taraf-ı vâlâlarından dahi ona göre harekete himmet buyurulması bâbında emr ü fermân hazret-i men-lehu’l-emrindir. Fî 13 Muharrem sene [1]290 ve fî 28 Şubat sene [1]288.