İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 119 Hüküm no: 90 Orijinal metin no: [43-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ecnebilerin emlak tasarruf etmeleri hususundaki kanunu, İtalya Devleti’nin de kabul ederek imzaladığı Taraf-ı vâlâ-yı Fetvâ-penâhîye 25 Ma‘rûz-ı bende-i dîrîneleridir ki, Memâlik-i mahrûse-i hazret-i şâhânede teba‘a-i ecnebiyenin tasarruf-ı emlâk etmeleri hakkında olan memnû‘iyetin ref‘iyle hakkında teba‘a-i Saltanat-ı seniyyenin nâil oldukları hukūka bunların îfâ ettikleri vezâif ile mükellef olmak şart-ı esâsî ve şurût-ı sâire ile nâil olmalarına bi’l-müsâ‘ade ol bâbda yapılmış olan kānûnnâme-i hümâyûna işbu hukūka nâil oldukları hâlde memâlik-i şâhânede bulunacak ecânib hakkında cereyân etmesi lâzım gelen mu‘âmelâtı mutazammın olup devletlerin kabûl ve imzâlarına ta‘lîkan imlâ ve tenmîk kılınmış olan mazbata-i resmiyenin sûret-i matbû‘ası mukaddemâ neşr ve i‘lân kılınmış idi. Zikrolunan mazbatanın ahkâm-ı mündericesini bu def‘a İtalya Devleti dahi tamamen kabûl ederek işbu mazbata Bâbıâlî ile sefâret beyninde bu kerre imzâ ve te‘âtî olunmağla karâr-ı mezkûrun devlet-i müşârün-ileyhâ teba‘ası haklarında dahi mütesâviyen icrâ ettirilmesi lâzım gelmiş olmağın 20 Ra sene [12]85 târihiyle tastîr olunan tezkirede bast ve temhîr kılınan vesâyâ vechile mu‘âmele olunması ve fakat bunların mazbata-i merkūmeyi henüz kabûl etmemiş olan devletler teba‘asından tefrîki zımnında Dersa‘âdet’de bulunan sefâretden birer takrîr istihsâl ve Hâriciye Kitâbet-i behiyesinden bu takrîrleri resmen tasdîk ettirdikden sonra iktizâ eden devâire mürâca‘at etmeleri zımnında ittihâz olunan usûl kemâ-kân bâkī olduğu beyânıyla tezkire-i âcizî terkīm kılındı. Ol bâbda emr ü fermân hazret-i men-lehu’l-emrindir. Fî 9 Safer sene [1]290 ve fî 26 Mart sene [1]289.