İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 135 Hüküm no: 107 Orijinal metin no: [52-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanzim edilmiş olan bütün senet, kefalet ve şirket mukavelenamelerinin resm-i nisbiye tâbi olduğu Taraf-ı âlî-yi cenâb-ı Meşîhat-penâhîye Ma‘rûz-ı bende-i dîrîneleridir ki, Mu‘ayyen kıymet veyâ meblağ üzerine yapılmış olan kâffe-i senedât ve kefâlet ve şirket ve mukāvelenâmelerin resm-i nisbiye tâbi‘ olacağı damga ve varaka-i sahîha nizâmlarının üçüncü ve beşinci maddeleri ahkâmı iktizâsından olduğu hâlde ba‘zı devâirden vukū‘ bulan mübâya‘ât için bâyi‘ ve müte‘ahhidlerle te‘âtî olunan senedât ve mukāvelenâmelerde mübâya‘a olunan erzâk ve eşyâ-yı sâirenin yalnız beher zirâ‘ veyâ aded-i fiyâtı gösterilip esmân-ı hâsıla-i mecmû‘ası tasrîh olunmaması gûyâ meblağ-ı mu‘ayyen olmadığı ser-rişte ile o gibi senedât ve mukāvelenâmelerin evrâk-ı maktû‘a ya‘ni on guruşluk varaka üzerine tanzîm ve te‘âtî olunmakda idiği haber alınıp hâlbuki mikdâr-ı zirâ‘ ve kıyye ve adedi ve beherine kaçar guruş fiyât vaz‘ eylediği ma‘lûm olan eşyânın mecmû‘-ı esmân-ı hâsılası dahi inde’l-hesâb mütebeyyen iken meblağ-ı mu‘ayyen olmadığını vesîle ile bu gibi senedât ve mukāvelenâmelerin resm-i nisbîden çıkarılması hasâr-ı hazîneyi dâ‘î ve sû-i sirâyeti? müeddî göründüğü beyânıyla ba‘de ezîn varaka-i sahîha-i nisbiye üzerine tanzîmi iktizâ eden senedât ve mukāvelenâmelerin nizâmen şâyân-ı kabûl olmayan o misillü te’vîlât ibnâen? varaka-i maktû‘a üzerine yazılması âdetinin terki ve ahkâm-ı nizâmiyenin malını bi’t-tamam muhâfazası husûsunun ta‘mîmen her tarafa iş‘âr ve tavsiyesi Rüsûmât Emânet-i behiyesinden bâ-tezkire beyân ve ifâde kılınmış ve keyfiyet bi’l-cümle devâir-i merkeziye ile vilâyâta ve idâre-i mahsûsada bulunan mutasarrıflıklara bildirilmiş olmağla taraf-ı âlî-yi Fetvâ-penâhîlerinden dahi nizâ[mnâ]me-i mezkûre ahkâmınca icrâsı bâbında emr ü irâde hazret-i men-lehu’l-emrindir. Fî 9 Cumâdelâhire sene [1]291 ve fî 11 Temmuz sene [1]290. Mukābele şüd.