İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 134 Hüküm no: 106 Orijinal metin no: [51-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erbab-ı cinayet ve cünhadan alınıp verilen mal ve eşyanın satışına dair hükümlere ait tamimin gönderildiği Makām-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Erbâb-ı cinâyet ve cünha bedellerinde ahz ü istirdâd olunan emvâl ve eşyânın sûret-i füruhtuna ve müteferri‘âtına dâir Şûrâ-yı Devlet’den kaleme alınan fıkarât-ı nizâmiyenin icrâ-yı ahkâmına encümen-i mahsûs-ı meşveret karârıyla bi’l-istîzân irâde-i seniyye-i cenâb-ı pâdişâhî şeref-sünûh ve sudûr buyrularak fıkarât-ı mezbûrenin nüsha-i musaddakları Dîvân-ı Ahkâm-ı Adliye ve Mâliye ve Zabtiye Nezâret-i celîleleriyle ta‘mîmen vilâyâta ve müstakillen idâre olunan mutasarrıflıklara gönderildiği misillü bir nüsha-i musaddakası taraf-ı eşref-i cenâb-ı Meşîhat-penâhîye irsâl kılınmış olmağla îfâ-yı muktezâ-yı hâle himmet buyurulması bâbında emr ü irâde hazret-i men-lehu’l-emrindir. Fî 29 Rebî‘ülâhir sene [1]291 ve fî 25 Mayıs sene [1]290. Mukābele şüd. Erbâb-ı cünha ve cinâyetden zabt ve istirdâd olunacak emvâl ve eşyânın sûret-i füruhtuna ve müteferri‘âtına dâir fıkarât-ı nizâmiyedir Vukū‘-ı cinâyet ve cünha ile hâsıl olan emvâl zabtolundukdan sonra içinde hayvanât ve mevâşî ve az zamanda mahv ve telef olmağa müsta‘id eşyâ bulunduğu ve derhâl sahibi zuhûr etmediği hâlde bir hafta müddet hıfz ve i‘lân olundukdan sonra Dersa‘âdet’de ise Beytü’l-mâl Kassâmlığı ve taşrada ise hükkâm-ı şer‘ ma‘rifeti ve meclis-i idârenin nezâreti ile satılacak ve bunlardan mâ‘adâ emvâl-i cânînin ikmâl-i muhâkemesine değin satılmayıp gerek aynen mevcûd bulunanların ve gerek minvâl-i meşrûh üzere satılmış olanların cins ve mikdârı Dersa‘âdet’de ise elsine-i mütenevvi‘ada neşrolunan gazeteler ve taşrada gazete bulunan mahâlde ise gazete ve bulunmadığı takdîrde vesâit-i münâsebe ile i‘lân olunacakdır ve esnâ-yı muhâkemede zuhûr eden eşyâ sahibleri şer‘an ısbât-ı müdde‘â ettikleri hâlde mallarından mevcûd olanları aynen ve satılmış olanları bedelen kendülerine teslîm kılınır cânînin ikmâl-i muhâkemesinde eşyâ-i mevcûde kezâlik Dersa‘âdet’de ise Beytü’l-mâl Kassâmlığı ve taşrada ise hükkâm-ı şer‘ ma‘rifeti ve meclis-i idârenin nezâretiyle bi’l-müzâyede satılıp cinsi ve kıymeti başka başka gösterilerek esmânı cedvellere idhâlen cânib-i hazîneye irsâl kılınacak ve cânînin muhâkemesi ikmâl <> olunup da eşyâ-i mevcûde satıldıkdan sonra iddi‘â-yı sahâbet edenler çıkdığı ve iddi‘âlarını şer‘an merkez-i sübûta getirdikleri takdîrde mazbût ve mukayyed olan bedeli sahiblerine verilecekdir. Fî 15 Rebî‘ülâhir sene [1]291 ve 19 Mayıs sene [1]290. Mukābele şüd.