İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 137 Hüküm no: 110 Orijinal metin no: [52-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ecnebilerin emlak tasarruf etmeleri hususundaki kanunu, Amerika’nın da kabul ederek imzaladığı Amerika vatandaşlarına tasarruf-ı emlâk hakkı verilmesi Taraf-ı vâlâ-yı Meşîhat-penâhîye Ma‘rûz-ı bende-i dîrîneleridir ki, Memâlik-i mahrûse-i şâhânede teba‘a-i ecnebiyenin tasarruf-ı emlâk etmeleri hakkında cârî olan memnû‘iyetin ref‘iyle emlâk hakkında teba‘a-i saltanat-ı seniyyenin nâil oldukları hukūka bunların îfâ ettikleri vezâif ile mükellef olmak şart-ı esâsı ve şurût-ı sâire ile nâil olmalarına bi’l-müsâ‘ade ol bâbda yapılmış olan kānûnnâme-i hümâyûn işbu hukūka nâil oldukları hâlde memâlik-i mahrûsede bulunacak ecânib hakkında cereyân etmesi lâzım gelen mu‘âmelâtı mutazammın olup devletlerin kabûl ve imzâlarına ta‘lîkan yapılmış olan mazbatanın karârını bu def‘a Amerika hükûmet-i müctemi‘ası dahi tamamen kabûl ederek işbu mazbata Bâbıâlî ile sefâret beyninde bu kerre imzâ ve te‘âtî olunmağla karâr-ı mezkûrun devlet-i müşârün-ileyhâ teba‘ası haklarında dahi mütesâviyen icrâ ettirilmesi lâzım gelmiş olmağın vesâyâ-yı mesbûka dâiresinde bunlar haklarında dahi sâir istimlâk edecek devletler teba‘ası gibi mu‘âmele-i mukteziyenin icrâsı husûsuna himem-i aliyye-i Fetvâ-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 7 Receb sene [12]91 ve fî 7 Ağustos sene [12]90.