İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 139 Hüküm no: 114 Orijinal metin no: [53-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahsi işler için verilecek olan arzuhallerin üçer kuruşluk takrir ve tezkire varakası üzerine yazılması Taraf-ı âlî-yi hazret-i Fetvâ-penâhîye Ma‘rûz-ı bende-i dîrîneleridir ki, Mesâlih-i zâtiyeye dâir verilecek istid‘âlar ile isti‘fâların arzuhâl kâğıdına ve istek eden mütehayyizân-ı me’mûrîn-i sâire taraflarından dahi üçer guruşluk takrîr ve tezkire varakası üzerine yazılması nizâmı iktizâsından olduğu hâlde isti‘fânın ba‘zı mahallerde yirmişer paralık varaka-i nisbiye üzerine tahrîr olunmakda idiği beyânıyla icrâ-yı îcâbı Rüsûmât Emânet-i behiyesinden bâ-tezkire ifâde olunup bi’d-defa‘ât iş‘âr olunduğu üzere nisbet-i nizâmiyesi mâdûnunda olan evrâka yazılan müsted‘iyât ve teblîgātın kabûl olunmaması me’mûrîn vezâif-i mahsûsâsından olarak bu bâbda gaflet ve müsâmaha vukū‘u karîn-i cevâz olamayacağından nizâm-ı mahsûs ahkâmının hüsn-i isti‘mâliyle vâridât-ı hazînenin halelden vikāyesi’çün îcâb edenlere icrâ-yı teblîgāt kılınmağla Bâb-ı Vâlâ-yı Fetvâ-penâhîlerince dahi nizâm-ı mezkûrun mer‘iyyü’l-icrâ tutulmasına himem-i aliyye-i Meşîhat-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 28 Ramazan sene [1]291 ve fî 26 Teşrîn-i evvel sene [1]290.