İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 139 Hüküm no: 115 Orijinal metin no: [54-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bin iki yüz doksan bir mali senesi Martı’ndan itibaren geçerli olan resm-i damga nizamnamesi Resm-i damga nizâmnâmesi bin iki yüz doksan bir sene-i mâliyesi Martı ibtidâsından i‘tibâren mer‘iyyü’l-icrâ olacakdır. Mezkûr nizâmnâme mûcebince bu kerre neşr ve ihrâc olunan evrâk-ı sahîha-i cedîde ortası tuğrâ-yı garrâ-yı hazret-i pâdişâhî ile müveşşah ve etrâfı beyâz zemîn üzerine derece ve bahâsını gösterir yazılarla murakkam bir aded siyah damga ile damga-yı Devlet-i aliyye ibâresiyle müzeyyen bir aded soğuk damga ile matbû‘ olacağı gibi tab‘ ve temsîl olunan pullar dahi yine tuğrâ-yı garrâ-yı hazret-i şehriyârî ile müveşşah olacakdır. Atîk varak-ı sahîha-i maktû‘a ile yirmi paralığından on guruşluğa kadar olan evrâk-ı nisbiyenin bahâ ve derecâtı yeni ta‘rîfeye tamamıyla muvâfık olduğundan bunlar evrâk-ı cedîde misillü Mart’dan sonra dahi isti‘mâl olunacak ise de on guruşlukdan yukarı olan atîk evrâk-ı nisbiye derecâtının mezkûr ta‘rîfeye adem-i tevâfuku cihetiyle târih-i mezkûrdan sonra bunların isti‘mâli câiz olmayacağı gibi idârelerde dahi sarf ve füruht olunmayıp tüccâr ve ahâlî ve bâyi‘ler yedlerinde bulunacak olanların Dersa‘âdet’de damga idâresinde ve taşralarda bi’l-cümle rüsûmât idârelerinde evrâk-ı cedîde ile meccânen mübâdele olunmak üzere sene-i merkūme Haziran’ı ibtidâsına kadar üç ay müddet tahsîs olunmuşdur. İşbu üç ay zarfında dahi evrâk-ı mezkûrenin isti‘mâli câiz olmayacakdır. Dersa‘âdet ve memâlik-i mahrûse-i şâhânede tab‘ ve ihrâc olunan gazetelerin beher nüshasına ikişer para kıymetinde ve bunların mahsûs bir şekil pul yapışdırılacakdır. Gerek gazetelere ve gerek i‘lânnâmelere yapışdırılacak pullar hurûfunun tab‘ından evvel varakanın ilk sahîfesinin yukarı tarafına yapışdırılmak lâzım gelir ve bir pul iki def‘a isti‘mâl olunmamak ve gazete veyâ i‘lânnâmenin tab‘ından evvel yapışdırılmış olduğu ma‘lûm olmak için tab‘ olunacak hurûfun bir mikdârı pulların yazılarını külliyen bozmayacak sûretde üzerlerine tesâdüf ettirilmek îcâb eder ve minvâl-i meşrûh üzere pulları ibtâl olunmayan gazete ve i‘lânnâmelere nizâmen damgasız nazarıyla bakılacakdır. Hisseli olarak bâ-fermân-ı âlî teşkîl olunmuş ve olunacak her nevi‘ şirketlerin gerek muvakkat ve gerek kat‘î hisse senedâtıyla tahvîlâtından bir def‘alık olarak yüzde bir hesâbıyla alınacak resm-i damga şirket idâreleri tarafından îfâ ve te’diye olunacakdır ve doksan bir senesi Martı’ndan sonra teşkîl olunacak o misillü şirketlerin gerek muvakkat ve gerek kat‘î hisse senedâtıyla tahvîlâtı koçanlı olacağından urulacak damga hem koçanı ve hem de yaprağı üzerine darb olunacak ise de târih-i mezkûra kadar çıkarılmış bulunan senedât ve tahvîlâtdan alınacak resm bunların mikdârı koçanlarının ibrâzıyla veyâ sûret-i sâir ile isbât ve ta‘yîn olundukdan sonra ber-minvâl-i muharrer şirket tarafından te’diye ve îfâ olunup rüsûmât emâneti cânibinden işbu resmin îfâ kılındığı Dersa‘âdet gazeteleri vâsıtasıyla i‘lân olunduğu hâlde senedât ve tahvîlât-ı mezkûreye damgalanmış nazarıyla bakılacak ve ondan sonra bunlardan damgalanmak üzere damga idâresine getirilecek olanlara meccânen damga urulacakdır, işbu yüzde bir resmin îfâsı için şirketlere mezkûr Mart ibtidâsından i‘tibâren nihâyet altı mâh mehil i‘tâ olunup bu müddet zarfında resm-i mezkûr te’diye olunmadığı hâlde Damga Nizâmnâmesi’nin yirmi dördüncü maddesi mûcebince cezâ-yı nakdî alınacakdır. Evrâk-ı sahîha ve pullar Dersa‘âdet’de Damga İdâresi tarafından ta‘yîn olunan mevâki‘-i müte‘addide-i mahsûsada bâyi‘ler ma‘rifetiyle füruht olunacak ve işbu bâyi‘lerin bulunduğu dükkânlar üzerinde varaka-i sahîha ve pul ibâresiyle birer levha ta‘lîk kılınacakdır ve taşralarda mezkûr evrâk ve pullar rüsûmât idârelerinde ve bunların tedârik ve ta‘yîn eylediği bâyi‘ dükkânlarında satılacakdır. Evrâk-ı âdiye üzerine darb-ı damga mu‘âmelâtı yalnız Dersa‘âdet’de Damga İdâresi’nde icrâ olunacakdır.