İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 142 Hüküm no: 119 Orijinal metin no: [57-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadılığı’na Ömer Lütfi Efendi’nin tayini Der-zamân-ı Ömer Lütfi Efendi hazretleri Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul pâyelülerinden Üsküdar Mahkeme-i İbtidâiyesi reisi olup riyâset-i mezkûre vekâletle idâre ettirilmek üzere bu def‘a uhdesine İstanbul kādısı tevcîh ve ihsân kılınan ve Mecîdî nişân-ı zî-şânının ikinci rütbesini hâiz ve hâmil olan Bodrumlu Mevlânâ Ömer Lütfi Efendi -zîdet fezailehû- tevkī‘-i refî‘-i hümâyûnum vâsıl olucak sen ki mevlânâ-yı mûmâ-ileyhsin, sen akrân ve emsâlin beyninde gevher-i ilm-i fazl ile muhallâ ve mevsûf olup her vechile sezâvâr-ı inâyet ve şâyeste-i mekremet olduğuna mebnî işbu bin iki yüz doksan iki senesi şehr-i Rebî‘ülâhiri gurresinden zabtetmek ve riyâset-i mezkûre vekâletiyle idâre ettirilmek üzere zikrolunan İstanbul kazâsını uhdene tevcîh ve ihsân kılınması husûsunu bi’l-fi‘il şeyhülislâm ve müfti’l-enâm olup murassa‘ nişân-ı Osmânî ile Mecîdî nişân-ı zî-şânının birinci rütbelerini hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Mevlânâ Hasan Fehmi Efendi -edâmallâhu te‘âlâ fezâilehû- telhîs etmeleriyle mûcebince hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânemden mevhibet efzâ-yı sünûh ve sudûr olup emr-i hümâyûn-ı şevket-makrûn-ı şâhânem muktezâ-yı münîfi üzere işbu fermân-ı celîlü’l-unvân-ı pâdişâhânem ısdâr ve i‘tâ olundu. Sâlifü’z-zikr İstanbul kazâsına gurre-i merkūmeden mutasarrıf olup icrâ-yı ahkâm-ı şerî‘at-i nebeviyeye bezl-i makdûr ve sa‘y-i mevfûr eyleyesin. Tahrîren fî 16 Rebî‘ülevvel sene [12]92.