İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 146 Hüküm no: 123 Orijinal metin no: [59-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlanma, alış-veriş hüccetleri ile ilam ve kassam defterleri için kullanılan evrak-ı nisbiye hakkında Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Mehâkim-i şer‘iyede idâne ve bey‘ ü şirâ hüccetleriyle i‘lâm ve kassâm defterleri için isti‘mâl olunan evrâk-ı nisbiyeden yirmi paradan üç guruşa kadar olan nev‘lerinin birleşdirilerek yüz guruşdan altı bin guruşa kadar olan mu‘âmelâtda isti‘mâl olmak üzere işâret-i mahsûsa ve üç guruş fiyât vaz‘ı ile bir cins kâğıd ihrâc ve füruht olunması lüzûmunu mutazammın Rüsûmât Emânet-i behiyesinden vârid olan tezkire Encümen-i Mahsûs-ı Meşveret’de lede’l-mütâla‘a meâlinden müstebân olduğu vechile evrâk-ı mezkûrenin birinci nev‘ine mevzû‘ yirmi para fiyât hâm kâğıd bedeliyle mesârif-i tab‘iye ve nakliye vesâiresine ancak vefâ edebildiği gibi bir ve iki guruşluk nev‘lerinden dahi kalın ve dayanıklı ve kıt‘aları büyükçe kâğıd isti‘mâl olunmasından dolayı hâsıl olan menâfi‘ cüz’î bulunmasına nazaran esâs tasavvur münâsib olup fakat gösterilen üç guruş biraz zâid olmasına ve bu makūle şirâda halka ağır gelmiyecek sûretde gözedilmesi lâzımeden bulunmasına mebnî işbu kâğıdların ikişer guruş fiyât ile satılması tensîb olunmuş ve bi’l-istîzân irâde-i seniyye-i cenâb-ı pâdişâhî dahi ol merkezde müte‘allik buyurulup keyfiyet emânet-i müşârün-ileyhâya iş‘âr kılınmış olmağla ol bâbda emr ü irâde hazret-i men-lehu’l-emrindir. Fî 15 Receb sene [1]292 ve fî 4 Ağustos sene [1]291.