İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 149 Hüküm no: 128 Orijinal metin no: [61-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Birikmiş olan halkın dilekçelerinin gönderilen cetvellere kaydedilerek bir an önce sırayla işlerinin halledilmesi Fazîletlü efendim hazretleri, Devâir-i şer‘iyeye muhavvel olan mevâdd-ı ibâdın tesrî‘-i tesviyesi me’mûrînin külliyen vakt ü zamanıyla işleri başlarında bulunup îfâ-yı vezâif-i mezkûreye sa‘y ü gayretlerine menût olmasıyla bu bâbda bi’d-defa‘ât icrâ-yı tenbîhât ve te’kîdât olunmuş idi. Yine derdest-i rü’yet haylice iş bulunduğu sür‘at-i tesviyesi emrinde ashâbı tarafından verilmekde olan istid‘ânâmelerde müsbit olup bu sûret ise hilâf-ı rızâ-yı âlî bir keyfiyet olmasıyla artık leffen irsâl-i sûy-ı fâzılâneleri kılınan nümûne vechile devâirde birer cedvel tanzîm ve şimdiye kadar muhavvel olup henüz arkası alınamayan evrâkın târih-i havâlâtıyla müdde‘î ve müdde‘â-aleyhin esâmîsini ve zât-ı maddenin nev‘ ve keyfiyet ve bu âna değin bâdî-i adem-i rü’yetini hânelerine imlâ ve terkīm ile makām-ı Meşîhate bi’l-i‘tâ vaz‘ edilecek numara mûcebince târih-i hâvâlesi mukaddem olandan bed’ ile sırasıyla işlerin tesviye ve tetmîm kılınması ve cedvel-i mebhûsün bir deftere kaydıyla bundan böyle havâle buyrulacak husûsâtın mezkûr defterde mukayyed olanlardan sonra bi’t-terkīm numarasının dahi ol sûretle yürüdülüp beher sene Muharremi’l-harâmının gurresinden i‘tibâren numaranın tecdîd olunması makāma verilecek cedvellerin Dâire-i Meşîhat’de de kaydı bulundurulacağından vukū‘atı yürüdülmek üzere rü’yet olunmuş veyâ yeniden havâle buyurulmuş olan husûsâtın beher mâh birer pusulasının verilmesi nihâyet altı mâhda arkası ya‘ni taht-ı hükme alınıp i‘lâm-ı şer‘îsi verilmek îcâb edeceğinden şâyed teehhur eder ise adem-i tesviyesine sebeb ne ise evrâkının rabtıyla îzâhan bâ-müzekkire bildirilmesi <> husûsları ittihâzıyla şu batâet-i meşhûdenin aradan kaldırılması lâzım gelmiş olduğundan iktizâ-yı rü’yet-i zâtiye ve fetânet-i müselleme-i fâzılâneleri üzere husûsât-ı meşrûhanın ber-minvâl-i meşrûh icrâsı îcâbıyla beraber zîr-i idâre-i âlîlerinde bulunan me’mûrîne güzelce bi’t-tefhîm mezkûr cedvelin dahi hemen tanzîm ettirilerek irsâl buyurulması himmet-i mütemâyize-i behiyelerinden muntazırdır efendim. Fî 21 Şa‘bân sene [1]292 ve fî 9 Eylül sene [12]91. Numara Târih-i havâle <> Nev‘-i madde İsm-i müdde‘î İsm-i müdde‘â-aleyh Sebeb-i teehhur 1 Fî-gurreti Muharrem sene [12]92 Miras Ahmed Osman Fetvâhâne’ye havâle olunmuş ise de henüz cevâbı vürûd etmemişdir.