İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 150 Hüküm no: 129 Orijinal metin no: [61-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Lütfi Efendi’nin Anadolu Kazaskerliği’ne tayini Kādıasker ta‘yîni A‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn keşşâfü’l-müşkilâti’d-dîniye hallâlü’l-mu‘dılâti’l-yakīniye miftâhu künûzi’l-hakāyık messâhu rumûzi’d-dekāyık el-mahfûzu bi-sunûf-i avâtıfi’l-meliki’l-a‘lâ hâlâ İstanbul kādısı ve Mecîdî nişân-ı zî-şânının ikinci rütbesini hâiz ve hâmil olan Bodrumî Mevlânâ Ömer Lütfi Efendi -edâmallâhu te‘âlâ fezâilehû- tevkī‘-i refî‘-i hümâyûnum vâsıl olucak ma‘lûm ola ki sen ki mevlânâ-yı müşârün-ileyhsin, sen hilye-i hasene-i ilm ü irfân ile mütehallî ve mevsûf ve gevher-i gîrân-bahâ-yı fazl ve kemâl ile müştehir ve ma‘rûf olup her vechile sezâvâr-ı inâyet ve şâyeste-i mekremet olduğuna mebnî işbu bin iki yüz doksan iki senesi şehr-i Şa‘bâni’l-mu‘azzamı birinci gününden i‘tibâren Anadolu kādıaskerliği pâye-i celîli uhdene tevcîh ve ihsân kılınması husûsunu bi’l-fi‘il şeyhülislâm ve müfti’l-enâm olup murassa‘ Osmânî nişân-ı hümâyûnumla Mecîdî nişân-ı zî-şânının birinci rütbesini hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Mevlânâ Hasan Fehmi Efendi -edâmallâhu te‘âlâ fezâilehû- telhîs etmeleriyle hakkında mezîd inâyet-i aliyye-i şâhâne ve mezîd ra’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânemden şeref-efzâ-yı sünûh ve sudûr olan emr-i hümâyûn-ı şevket-makrûn-ı şâhânem muktezâ-yı münîfi üzere pâye-i mezkûreye nâiliyetini mutazammın işbu fermân-ı celîlü’l-unvân-ı pâdişâhânem ısdâr ve i‘tâ olundu. Zikrolunan Anadolu kādıaskerliği pâye-i celîline târih-i merkūmdan i‘tibâren mutasarrıf ve nâil olup temâdî-yi eyyâm-ı ömr-i devlet ve ikbâl-i pâdişâhânem da‘avâtına muvâzabet ve iştigāl üzere olasın. Fî 17 Şa‘bân sene [1]292.