İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 150 Hüküm no: 130 Orijinal metin no: [62-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evkaf musakkafat ve müstagallatının ferağında ortaya çıkan nizaların kanuna uygun olarak halledilmesi Makām-ı Meşîhat’den Semâhatlü efendim hazretleri Dersa‘âdet ve bilâd-ı selâsede vâki‘ evkāf-ı şerîfe müsakkafât ve müstagallâtından vukū‘ bulan ferâğ-ı kat‘î ve istiğlâl husûslarında ba‘zı fâriğ ile mefrûğun-leh beyninde hilâf-ı vâki‘ takrîr ve ifâde olunmasından dolayı zuhûra gelen münâza‘âta mahâl kalmamak için ferâğın sûret-i cereyânının temessüke derc ettirilmesi ve teferru‘âtı hakkında altmış târihinde ittihâz kılınmış olan nizâma mugāyir mahkeme-i teftîş vesâire taraflarından de‘âvî istimâ‘ olunmasından nâşî nizâm-ı mezkûr medlûlünün halelden vikāyesi zımnında ta‘yîn olunan beş mâh müddet içinde öyle muvâza‘a sûretiyle icrâ olunmuş ferâğ var ise tashîh olunup o müddetden sonra bu yolda vukū‘a gelecek de‘âvînin bir sened-i mu‘tebere adem-i istinâdı hâlinde istimâ‘ olunmaması taht-ı idâre-i seniyyede olduğu hâlde mürûr-ı zaman ile o misillü ferâğ-ı kat‘îler şart da‘vâsı ser-riştesiyle fesh ve senedât-ı resmiye ibtâl ile ba‘zı tarafdan tarîk-i hîle ve tezvîre sülûk olunmakda idiği cihetle şikâyât-ı mütevâliye vukū‘a gelmekde olup nizâm-ı mezkûr ise halkın te’mîn-i hukūku maksadıyla müesses olmağla beraber hükm-i irâde-i seniyyenin şart da‘vâsına dahi şümûlü derkâr bulunmuş olmasına mebnî bu misillü ahvâlin men‘-i cereyânı zımnında Meclis-i Mahsûs-ı Vükelâ’da keyfiyet dermeyân olunarak o yolda teblîgāt ve tenbîhâtın ez ser-i nev te’kîdiyle her hâlde nizâm-ı mezbûra tevfîk mu‘âmelât olunmasının me’mûrîn-i şer‘iyeye sûret-i kat‘iyede lüzûm-ı tefhîm ve tenbîhi bâ-tezkire-i sâmiye-i cenâb-ı vekâlet-penâhî iş‘âr buyurulmuş olmağla ba‘de ezîn ber-minvâl-i muharrer îfâ-yı muktezâ-yı hâle himem-i vâlâ-yı semîhâneleri derkâr buyurulması siyâkında tezkire-i senâverî terkīmine ibtidâr olundu efendim. Fî 24 Zilhicce sene [12]92 ve fî 10 Kânûn-ı sânî sene [1]291.