İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 153 Hüküm no: 135 Orijinal metin no: [1-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülaziz tahttan indirip yerine Murad’ın geçtiği İstanbul kādısı semâhatlü efendi hazretleri Mukadderât-ı İlâhiyeden olarak bu kerre ittifâk-ı umûmî ile Sultân Abdülaziz hazretleri hal‘ ile taht-ı âlî-baht-ı Osmânî vâris-i meşrû‘-ı hilâfet-i ulyâ olan şevketlü mehâbetlü kudretlü Sultan Mehmed Murad-ı hâmis hazretlerinin cülûs-ı meyâmin-me’nûs-ı mülûkâneleriyle teşerrüf ederek bî‘at-ı umûmiye resm-i celîli emrolunduğu misillü sünnet-i seniyye-i seyyidü’l-mürselînden ol kırâet-i hutbe kā‘ide-i mübâreke ve müteyemminesinin taraf-ı eşref-i hilâfet-penâhîlerinden bi’l-vekâle îfâ olunması emrinde hutebâ-yı kirâma me’zûniyetini hâvî hatt-ı hümâyûn-ı şevket-makrûn-ı mülk-dârî şeref-pîrâ-yı sahîfe-i sutûr olmuş ve mantûk-ı münîfi üzere keyfiyet Galata ve Üsküdar nâibi efendilere bildirilmiş olmağla zât-ı semûhîleri dahi keyfiyet-i me’zûniyetlerinin ve esnâ-yı kırâet-i hutbe-i şerîfede nâm-ı nâmî ve ism-i sâmî-i hazret-i pâdişâhînin yâd ve tilâvet olunması husûsunun Dersa‘âdet’de bulunan bi’l-cümle cevâmi‘-i şerîfe hutebâ-yı kirâmına ifâde ve i‘lânına himmet buyurula deyü. Fî 9 Cumâdelûlâ sene [1]293.