İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 157 Hüküm no: 144 Orijinal metin no: [3-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî daireler ile şahıslar arasındaki davalara irsal olunacak vekiller için resmi dairelere doğrudan doğruya davetname gönderileceği Huzûr-ı ma‘âlî-mevfûr-ı hazret-i Meşîhat-penâhîye Ma‘rûz-ı bende-i dîrîneleridir ki, Devâir-i resmiye ile eşhâs beyninde tahaddüs eden de‘âvîden dolayı âid olduğu devâirden li-ecli’l-muhâkeme eyyâm-ı mu‘ayyenesinde vekîl irsâli zımnında mehâkimden tanzîm olunan da‘vetnâmeler şimdiye kadar nezâret-i âcizî vesâtetiyle bâ-tezkire devâir-i mezkûreye gönderilmekde ise de ber-vech-i meşrûh muhâkemeye ta‘yîn olunan eyyâmın ba‘zısı muhâbere ile geçmesinden dolayı istenilen vekîlin ekseriyâ vakt ü zamanıyla mahkemede bulunamamasını ve bu ise bi’t-tab‘ emr-i muhâkemenin âhar bir güne ta‘lîkını istilzâm eylemekde olmasına mebnî ba‘demâ nezâret-i âcizî vesâtetine mürâca‘at edilmeksizin doğrudan doğruya devâir-i resmiyeye da‘vetnâmeler gönderilmek üzere Dersa‘âdet mehâkim-i ticâretiyle hukūk dâireleri rüesâsına me’zûniyet i‘tâsı husûsuna bâ-takrîr vukū‘ bulan istîzân üzerine irâde-i aliyye müte‘allik buyurulmuş ve keyfiyet iktizâ eden mahallere bildirilmiş olmağla ol bâbda emr ü fermân hazret-i men-lehu’l-emrindir. Fî 27 Receb sene [1]293 ve fî 5 Ağustos sene [1]292. Halil Şerif