İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 156 Hüküm no: 143 Orijinal metin no: [3-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî evraklarda ya Musevî milleti veya eskiden olduğu gibi sadece Gayrimüslim denilmesine dair hahambaşı kaymakamının talebi Makām-ı âlî-yi cenâb-ı Meşîhat-penâhîye Bâbıâlî Nezâret-i celîle-i Hâriciye Mezâhib Odası Ma‘rûz-ı bende-i dîrîneleridir ki, Evrâk-ı resmiye ve matbû‘ada sunûf-ı teba‘adan bahsolunduğu sırada öteden berü Müslim ve gayr-ı Müslim ta‘bîri isti‘mâl edilmekde bu cihetle gayr-ı Müslim ta‘bîrine millet-i Museviye dahi dâhil olmakda olduğu hâlde bir müddetden berü yalnız İslâm ve Hristiyan denilerek iktifâ olunmakda ve ta‘bîrlerin adem-i şumûlü cihetiyle millet-i merkūme teba‘a-i Devlet-i aliyye sırasında zikrolunmayarak kalmakda olduğundan bahisle o makūle evrâk-ı resmiye ve matbû‘ada evvelki gibi ya Müslim ve gayr-ı Müslim ta‘bîrinin veyâhûd millet-i merkūme nâm-ı sarîhinin derc ü isti‘mâl olunması Dersa‘âdet hahambaşısı kāimmakāmlığından bâ-takrîr istid‘â kılınmış olmağla ber-mûceb-i istid‘â îcâb-ı hâle masrûf-ı himem-i aliyye-i Fetvâ-penâhîleri bâbında emr ü irâde hazret-i men-lehu’l-emrindir. Fî 9 Şa‘bân sene [1]293 ve fî 17 Ağustos sene [1]292.