İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 158 Hüküm no: 147 Orijinal metin no: [7-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Celaleddin Efendi’nin İstanbul Kadılığı’na tayini Der-zamân-ı fazîletlü es-Seyyid Mehmed Celaleddin Efendi hazretleri Fî-gurreti Rebî‘ülâhir sene [1]294 Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în İstanbul pâyelerinden olup Mecîdî nişân-ı zî-şânının ikinci rütbesini hâiz ve hâmil olan Sakız Nakībîzâde Mevlânâ es-Seyyid Mehmed Celaleddin Efendi -zîdet fezailehû- tevkī‘-i refî‘-i hümâyûnum vâsıl olucak ma‘lûm ola ki, sen ki mevlânâ-yı müşârün-ileyhsin, sen akrân ve emsâlin beyninde gevher-i ilm ve fazl ile mütehallî ve mevsûf olup her vechile sezâvâr-ı inâyet ve şâyeste-i mekremet olduğuna mebnî işbu bin iki yüz doksan dört senesi şehr-i Rebî‘ülâhiri gurresinden zabtetmek üzere İstunbul kazâsının uhdene tevcîh ve ihsân kılınması husûsunu bi’l-fi‘il şeyhülislâm ve müfti’l-enâm olup murassa‘ Mecîdî ve Osmânî nişân-ı zî-şânlarını hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazli ve’l-yakīn Mevlânâ Hasan Hayrullah Efendi -edâmallâhu te‘âlâ fezâilehû- telhîs etmeleriyle mûcebince hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânemden mevhibet-efzâ-yı sünûh ve sudûr olan emr-i hümâyûn-ı şevket-makrûn-ı şâhânem muktezâ-yı münîfi üzere işbu fermân-ı celîlü’l-unvân-ı pâdişâhânem ısdâr ve i‘tâ olunup zikrolunan İstanbul kazâsı gurre-i merkūmeden mutasarrıf olup icrâ-yı ahkâm-ı şerî‘at-ı nebeviyeye bezl-i makdûr ve sa‘y-i mevfûr eyleyesin. Fî 17 Rebî‘ülevvel sene 1294. Vezîr-i a‘zam İbrahim Edhem