İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 160 Hüküm no: 150 Orijinal metin no: [8-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmza ve mühür yapılırken senetlere yapıştırılan pulların üzerine gelmesine dikkat edilerek pulların tekrar kullanımının önüne geçilmesi Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Damga Nizâmnâmesi’nin on beşinci maddesi hükmünce pullar senedâtın hîn-i temhîr ve imzâsında yapışdırılması ve bir pul iki def‘a isti‘mâl olunmamak ve bir senedin pulu hîn-i temhîr ve imzâsında yapıştırılmış olduğu ma‘lûm olmak için mühür veyâ imzânın bir kısmı pulların yazılarını külliyen bozmayacak sûretde üzerine tesâdüf ettirilmesi ve eğer pullar müte‘addid olup da bir imzâ ve yâhûd mühürün her birinin birer kısmına tesâdüf ettirilmesi kābil olmaz ise mühür veyâ imzânın tekerrürü câiz olup pulları bu vechile ibtâl olunmayan sened nizâmen damgasız i‘tibâr olunması lâzım gelir iken ba‘zı mehâkim ve mal sandıklarıyla sâir mevâki‘ resmiyede buna ri‘âyet olunmayarak ol vechile pulları ibtâl olunmayan evrâkın kabûl olunmakda olduğu tahkīkāt-ı vâkı‘adan anlaşıldığına ve bu makūle ibtâl olunmayan pulların muahharan senedâtın üzerlerinden yırtılmaksızın çıkarılarak diğer senedâtda kullanılacağı ve bu ise vâridât-ı hazînenin zıyâ‘ını müeddî olacağı cihetle şu hâlin men‘-i vukū‘u lâzımeden bulunduğuna mebnî mehâkim ve mevâki‘-ı resmiyeye ibrâz olunan ve ber-mûceb-i nizâm pulları lâyıkıyla ibtâl olunmayan evrâk ve senedâta âdetâ damgasız nazarıyla bakılarak mu‘âmele-i nizâmiyenin ve bu bâbda kayıdsızlık ile o makūle evrâkı kabûl eden me’mûrlar haklarında nizâmnâme-i mezbûrun yirmi ikinci maddesi hükmüne tevfîkan mücâzât-ı lâzımenin icrâsı Rüsûmât Emânet-i celîlesinden bâ-tezkire vukū‘ bulan iş‘âr üzerine lâzım gelenlere ta‘mîmen tevcîh ve ve izbâr kılınmış olmağla Bâb-ı Vâlâ-yı Fetvâ-penâhîlerince iktizâ-yı hâlin îfâsına himem-i aliyyeleri derkâr buyurulmak bâbında emr ü irâde hazret-i men-lehu’l-emrindir. Fî 13 Cumâdelâhire sene [1]294 ve fî 12 Haziran sene [12]93.