İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 160 Hüküm no: 151 Orijinal metin no: [8-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pulların nizamından noksan yapıştırılmaması, arzuhallerin de kötü kâğıda yazılmaması Taraf-ı âlî-yi Meşîhat-penâhîye Ma‘rûz-ı bende-i dîrîneleridir ki, Damga Resmî Nizâmnâmesi’nde münderic derecât-ı nisbiyeye göre meselâ meblağ-ı mu‘ayyen üzerine yapılmış olan on bir bin guruşluk bir senedden bi’n-nisbe yedi buçuk guruş alınmak lâzım gelir iken ba‘zan bir beş guruşluk ve bir de yirmi paralık iki pul rabtıyla iktifâ olunarak noksan pul alındığı ve bir de ashâb-ı mesâlih tarafından devâire i‘tâ kılınmakda olan arzuhâller âdî varaka üzerine tahrîr ettirilmekde olduğu haber verildiğinden ve pul misillü evrâk ve senedâtdan alınması lâzım gelen damga resmi nizâm-ı mahsûsla mu‘ayyen olup hükm-i nizâmın tamamî-i cereyânı lâzımeden ve buna muhâlif ahvâlin adem-i vukū‘una dikkat ve i‘tinâ olunması me’mûrînin vezâifinden olduğundan ve hilâfı hareket hasâr-ı hazîneyi müeddî olacağı cihetle nizâm-ı mahsûsuna dahi muharrer olduğu vechile mütecâsirleri hakkında mesûliyeti mûcib bulunduğundan o makūle senedâtın evvel-emirde nizâm-ı mahsûsunun üçüncü maddesinde gösterilen sûrete muvâfık varakaya yazılmış olup olmadığının tedkīkiyle hilâf-ı nizâm yazılmış olduğu tebeyyün eylediği hâlde îcâb-ı nizâmının icrâsı ve ba‘de ezîn âdî evrâk üzerine arzuhâl kabûl olunmaması Şûrâ-yı Devlet karârıyla ta‘mîmen vilâyâta ve müstakillen idâre kılınan mutasarrıflıklara iş‘âr ve iktizâ eden devâire dahi beyân ve izbâr kılınmış olmağın karâr-ı mezkûr dâiresinde ale’d-devam îfâ-yı vazîfe-i me’mûrine i‘tinâ ve himmet ve aksi hâl vukū‘undan mübâ‘adet buyurulması bâbında emr ü fermân hazret-i veliyyü’l-emrindir. Fî 15 Cumâdelâhire sene [1]294 ve fî 14 Haziran [12]93.