İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 176 Hüküm no: 170 Orijinal metin no: [22-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazı memurların Cuma gününden başka günlerde tatil yaptıkları duyulduğundan buna müsade edilmemesi İstanbul Kādılığı’na Fazîletlü efendim hazretleri, Devâir-i şer‘iye me’mûrlarının her gün nihâyet sâ‘at altıda işleri başında bulunarak ahşamları sâ‘at ondan evvel infikâk etmemeleri geçende sûy-ı fâzılânalerine tavsiye ve inbâ kılınmış idi. Bundan murâd mesâlih-i ibâdın vakt-i kâmile ile bilâ-te’hîr hüsn-i temşiyeti nezd-i âlîde fevka’l-gāye matlûb ve mültezem olmasıyla me’mûrîn-i kirâmın bu şehrâh-ı müncîde devamları arzudan ibâret olup hâlbuki me’mûrîn-i mûmâ-ileyhden her gün mahâll-i me’mûriyetlerinde bulunmaları lâzım gelenlerden ba‘zılarının Cum‘a[dan] başka ba‘zı günleri ta‘tîl hükmüne koyarak devam etmemekde oldukları görülmekde ve bu ise maksad-ı meşrûha tamamıyla münâfî bulunmakda olduğundan ba‘de ezîn dâire-i aliyyelerinde bulunan o misillü me’mûrîn ve hademenin [23] bir ma‘zeret-i meşrû‘âları olmadıkça Cum‘a’dan mâ‘adâ her gün behemehâl mahâll-i me’mûriyetlerine devam etmeleri husûsunun ekîden kendilerine tenbîh buyurulması siyâkında tezkire-i senâverî terkīm kılındı. Fî 12 Muharrem sene [1]296 ve fî 25 Kânûn-ı evvel sene [1]294.