İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 176 Hüküm no: 169 Orijinal metin no: [22-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memurların sabah ve akşam mesailerine dikkat ederek işlerinin başında bulunmaları İstanbul Kādılığı’na Fazîletlü efendim hazretleri, Kâffe-i me’mûrînin vakt ü zamanıyla mahâll-i me’mûriyetlerine devam ve umûr-ı ibâdın bilâ-te’hîr mihver-i lâyıkında rü’yet ve temşiyetine bezl ve sa‘y ü iktidâr ile cümle tarafından cânib-i seniyyü’l-cevânib-i hazret-i zıllullâhîye de‘avât-ı hayriye isticlâbına gayret ve ihtimâm eylemeleri uhde-i me’mûriyet ve hamiyete mer‘iyyet vecâibden olup bu esâsı cümleden ziyâde hademe-i şer‘-i şerîfin ri‘âyet etmeleri ehem ve elzem olmağla ba‘demâ dâire-i fâzılânelerinde bulunan büyük ve küçük kâffe-i me’mûrînin nihâyet sâ‘at altı raddelerinde me’mûriyetleri başında bulunarak mesâlihin hüsn-i rü’yet ve sür‘at ve temşiyetine gayret eylemelerinin ve ahşamları sâ‘at ondan evvel avdet edilmemesinin kendilerine şedîden ve ekîden tenbîh buyurulması siyâkında tezkire-i mahsûsa terkīm kılındı efendim. Fî 15 Zilhicce sene [1]295 ve fî 28 Teşrîn-i sânî sene [12]94.