İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 179 Hüküm no: 176 Orijinal metin no: [24-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmani ve Mecidi nişanları zâta mahsus olduğundan görevden ayrılma durumunda iadesi gerektiği, terekelerde zuhur ederse bunların tereke tahririni yapan kâtiplerce Bâbıâlî’ye ulaştırılması Bâbıâlî Dâire-i Sadâret-i uzmâ Taraf-ı âlî-yi Meşîhat-penâhîye Ma‘rûz-ı bende-i dîrîneleridir ki, Osmânî ve Mecîdî nişânlarının zâta mahsûs olmasıyla hal‘ vukū‘unda istirdâdı lüzûmuna mebnî terekelerden zuhûr eden bu nevi‘ nişânların hazîne-i celîleye i‘âdesi usûl ve nizâmı iktizâsından bulunduğu hâlde bir müddetden berü bu kā‘ideye ri‘âyet olunmaması teşrîfât ve nişân-ı hümâyûn kalemlerince teşettüt-ı kuyûdu mûcib olduğundan terekelerde zuhûr eden bu gibi nişânların tereke tahrîrine me’mûr kısmet-i askeriye ketebesi ma‘rifetiyle ahz edilerek Bâbıâlî’ye irsâli husûsunun taraf-ı vâlâ-yı Meşîhat-penâhîlerine ve bi’l-cümle vilâyâta ve müstakillen idâre olunan mutasarrıflıklara iş‘ârı cânib-i Teşrîfâtî-i Dîvân-ı hümâyûndan bâ-müzekkere ifâde olunarak îcâbı icrâ kılınmış olmağla Bâb-ı Vâlâ-yı Fetvâ-penâhîlerince îcâb edenlere tenbîhât-ı mukteziye îfâsına himem-i aliyye-i Meşîhat-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 29 Ra sene [1]296 ve fî 10 Mart sene [12]95.