İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 182 Hüküm no: 180 Orijinal metin no: [26-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emlakın hacizli olması ihtimali olduğundan Emlak Kalemi’ne bilgi verilmeden ferağ ve intikal yapılmaması Ser-kurenâ-yı hazret-i şehriyârî-i esbak Mehmed Neşet Bey b. Ali Bey’in vukū‘-ı vefâtına mebnî mutasarrıf olduğu İstavroz karyesi bağları hilâlinde kâin mukaddemâ üç el-yevm bir kıt‘adan ibâret olan bağ ma‘a köşkden on beş dönüm iki yüz otuz dört zirâ‘ mahalli yüzlük kāime yüz guruş hesâbıyla yüz on bin guruşa rüsûmât muhâsebecisi İbrahim Rüşdü Efendi’ye tefrîgan fî 23 Safer sene [1]296 târihli Evkāf-ı hümâyûn Müfettişliği’nden verilen hüccet mûcebince ferâğı icrâ olunmuş ise de emlâk kalemine ma‘lûmât verilerek kā‘ideten alınması lâzımeden olan ruhsat tezkiresi alınmaksızın icrâ edildiği hüccet-i mezkûre meâliyle mahâll-i müfrez-i mezkûr Kısıklı karyesinde Bağlar sokāğında bir numarada olarak müteveffâ-yı mûmâ-ileyh Neşet Bey uhdesinde mahcûz olarak mukayyed idiği esâs ve vergileri dahi istifâ olunmaksızın takrîri alındığı [27] mu‘âmele-i vâkı‘adan ve bu sûretde bir mülkün ferâğ ve intikāli evvel-emirde vergi-yi müterâkimesinin îfâsıyla taht-ı hacizde olmadığı takdîrde ruhsat tezkiresi istihsâline mütevakkıf olmağla kaleme asla ma‘lûmât verilmeksizin ferâğının icrâ-yı vukū‘ât kayıdlarının teşvîşini vergi-yi müterâkimenin dahi tahsîlince tes‘îbâtı ve sâniyen bu misillü emlâk-i mahcûzenin ferâğının icrâsından dolayı mesûliyet-i şedîdeyi müstelzim olacağından ba‘de ezîn bu misillü ferâğın men‘-i vukū‘u zımnında mehâkim-i şer‘îye teblîgāt ve tenbîhât icrâ buyurulmak üzere keyfiyetin makām-ı Meşîhat-penâhîye bâ-tezkire-i emânât-penâhî iş‘âr buyurulması zımnında işbu tezkire komisyona takdîm kılındı. Fî 28 Mayıs sene [1]295. Dersa‘âdet Emlâk Kalemi Emlâk Kalemi’nin işbu müzekkeresi mûcebince ba‘demâ kalem-i mezkûra ma‘lûmât verilmeksizin o makūle ferâğ ve intikālin icrâsına müsâ‘ade olunmaması husûsunun mehâkim-i şer‘iyeye emr ü iş‘âr buyurulması lüzûmundan bahisle keyfiyetin makām-ı ulyâ-yı cenâb-ı Fetvâ-penâhîye iş‘ârı tezekkür kılınmağın îfâ-yı muktezâsı bâbında emr ü fermân hazret-i men-lehu’l-emrindir. Fî 29 Mayıs sene [1]295. Vergi-yi Emlâk ve Rüsûmât Komisyonu Huzûr-ı âlî-yi hazret-i Fetvâ-penâhîye Ma‘rûz-ı bende-i dîrîneleridir ki, Tahrîr-i Emlâk Komisyonu’ndan bu kerre verilen müzekkere manzûr-ı âlî-yi Meşîhat-penâhîleri buyurulmak üzere leffen arz ve takdîm kılınmış ve icrâ-yı îcâbı merhûn-ı irâde-i aliyye-i cenâb-ı Fetvâ-penâhîleri bulunmuş olmağla ol bâbda emr ü fermân hazret-i men-lehu’l-emrindir. Fî 25 Cemâziyelâhire sene [12]96 ve fî 3 Haziran sene [12]95. Mehmed Ârif