İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 182 Hüküm no: 179 Orijinal metin no: [26-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resmî daireler ile şahıslar arasındaki davalarda vekil tayini ve verilecek teminatlara dair Bâbıâlî Dâire-i Sadâret-i uzmâ Taraf-ı âlî-yi hazret-i Meşîhat-penâhîye Ma‘rûz-ı bende-i dîrîneleridir ki, Devâir-i resmiye ile eşhâs beyninde tahaddüs edecek de‘âvîden dolayı ta‘yîn olunacak vekîllerin sûret-i nasbı ve işbu vekîllerin doğrudan doğruya mehâkime celbi ve bidâyet-i da‘vâda alınacak rub‘ harc maddesi hakkında geçende Şûrâ-yı Devletçe verilen karâr fî 25 Ra sene [12]96 târihinde devâir nüzzâr ve rüesâsıyla ta‘mîmen vilâyâta iş‘âr ve devâir-i resmiyeden istînaf ve temyîz için i‘tâ olunacak te’mînâtın ne yolda icrâ edilmesi lâzım geleceğinin ta‘yîn ve îzâhı şûrâ-yı mezkûra havâle ve izbâr olunmuş idi. Bu bâbda cereyân eden müzâkerâtı hâvî Tanzîmât Dâiresi’nden kaleme alınan mazbata meâlinden müstebân olduğu vechile kefâlet ve te’mînât maddesi müste’nef ve müsted‘î temyîz haksız çıkar ise diğer tarafın hukūk-ı sâbitesi ve istînaf ve temyîzden dolayı dûçâr olacağı zarar ve ziyânı taht-ı te’mîne almak maksadına mebnî olarak hükûmet emîn ve aleyhinde sâdır olacak hükmü icrâya muktedir olduğundan eşhâs tarafından hükûmet aleyhinde ikāme olunan temyîz ve istînaf da‘vâlarında kemâ-fi’s-sâbık te’mînât ahzıyla hükûmetin eşhâs aleyhine ve istînaf ikāme edeceği da‘vâlarda mahkûmun-bihin tamamen te’diye olunacağını mübeyyin ikāme-i da‘vâ eden dâire-i vilâyet ve livânın muhâsebe ve mal sandığı nâmına olarak memhûr bir senedin hükûmet vekîli vâsıtasıyla mahkemeye göndermesi te’mîn-i maksada kâfî göründüğünden ol sûretle îfâ-yı muktezâsı îcâb edenlere tavsiye ve <> iş‘âr kılınmış ve mehâkime dahi teblîgāt-ı lâzıme icrâsı Adliye Nezâret-i celîlesine bildirilmiş olmağla oraca dahi suver-i muharrere vechile îfâ-yı mu‘âmeleye himem-i aliyye-i Meşîhat-penâhîleri derkâr buyurulmak bâbında emr ü irâde hazret-i men-lehu’l-emrindir. Fî 6 Cemâziyelâhire sene [12]96 ve fî 15 Mayıs sene [12]95.