Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 549 Hüküm no: 667 Orijinal metin no: [116a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraçhane Vakfı’na olan borcunu ödemesi için Ramazan Beşe’ye tembih Edâya tenbîh Mahmiye-i İstanbul’da Saraçhâne ahâlîsinin mühimmâtına mevkūfe nukūdun bi’l-fi‘l mütevellîsi olan işbu bâ‘isü’l-kitâb yesârî Mustafa Çelebi b. Hüseyin meclis-i şer‘-i şerîf-i enverde yine tâife-i mezbûreden sâbıkan kethüdâ olan Ramazan Beşe mahzarında üzerine da‘vâ ve takrîr-i kelâm edip mezkûr Ramazan Beşe zimmetinde mütevellîsi olduğum vakf-ı mezbûr malından beş yüz on esedî guruş vakf-ı mezbûra edâ[sı] lâzım deyni olmağın suâl olunup meblağ-ı mezbûru vakıf için bana alıverilmesi matlûbumdur dedikde gıbbe’s-suâl mezbûr Ramazan Beşe cevâbında müdde‘î-i mezbûrun mütevellîsi olduğu vakf-ı mezbûra ancak iki yüz elli guruş deyni olduğunu ikrâr ziyâde iki yüz altmış guruşu inkâr edicek müdde‘î-i mezbûrdan ziyâde müdde‘âsına beyyine taleb olundukda ityân-ı beyyine için istimhâl etmeğin mehil-i şer‘î birle imhâl olundukdan sonra ikrârı mertebesi olan meblağ-ı mezbûr iki yüz elli guruşu vakıf için mütevellî-i mezbûra edâ ve teslîme mezbûr Ramazan Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Halil Çelebi saraç, Mehmed Çelebi saraç, Ahmed Çelebi saraç, Mustafa Çelebi b. Ahmed, İbrahim Çelebi [b.] Ahmed, Süleyman Çelebi.