İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 191 Hüküm no: 190 Orijinal metin no: [35-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mağşuş sikkeler hakkında ilan edilen kararnamenin gönderildiği Der-zemân-ı fazîletlü Ebulhayr Efendi hazretleri Gurre-i Rebî‘ülâhir 1297 Başvekâlet’den Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Ma‘lûm-ı vâlâları olduğu üzere sikkekât-ı mağşûşa hakkında geçende bâ-irâde-i seniyye neşr ve i‘lân olunan karârnâmenin altıncı maddesinin hâtimesinde doksan beş senesi gāyetine kadar olan sikke-i mağşûşa, bakāyâ dahi doksan altı senesi şehr-i Ağustos gāyetine kadar fiyât-ı mevzû‘asıyla sikke-i mağşûşa olarak kabûl olunacak ve hazîne-i celîlenin doksan beş senesi düyûnu dahi alındığı fiyât-ı mevzû‘asıyla sikke-i mağşûşa olarak îfâ kılınacak deyü muharrer olup bakāyâ için ol sûretle Ağustos gāyetine değin fiyât-ı mevzû‘asıyla sikke-i mağşûşa kabûlü yalnız ahâlî hakkında devletçe irâe-i teshîlât ile beraber tesrî‘-i tahsîlât maksadına mübtenî ise de hazîne-i celîlenin a‘şâr bedelâtı ve zehâir esmânı gibi eşhâs üzerinde olan matlûbâtı’çün zikrolunan Ağustos gāyetine kadar fiyât-ı mevzû‘asıyla sikke-i mağşûşa kabûlü câiz olamayacağı gibi hazîne-i celîlenin doksan beş senesi düyûnunun dahi alındığı vechile îfâsı ya‘ni beşlik beş guruşa tedâvül ederken mübâya‘a olunan eşyâ esmânının şimdi yarı yarıya verilmesi mukārin-i adl ve hak olamayıp bu sûretin kābilü’l-icrâ olmadığına dâir her tarafdan pek çok iş‘ârât ve şikâyât vukū‘ bulmakda idiğine ve bir de vilâyâtda bulunan me’mûrînin ekseri ile Dersa‘âdet’de hâsılâtı olan devâir me’mûrları ma‘âşlarını tamamen alıp diğerleri düyûn sırasında kalmış ise de bunun cüz’iyet mikdârıyla beraber sunûf-ı bendegânımın bir takımı ma‘âşlarını vakt ü zamanıyla alıp da ba‘zılarının hem vaktiyle ma‘âş alamaması ve hem de işleyen ma‘âşlarının şimdi bir nısfından mahrûm idiler. Muvâfık-ı şân-ı ma‘delet-nişân-ı âlî olamayacağına binâen düyûn-ı hazîne-i celîlenin müdâyenât ve mu‘âmelât-ı nâs hakkında bâ-irâde-i seniyye ittihâz olunup diğer tahrîrât-ı umûmiye-i senâverî ile teblîğ kılınan karâra tevfîkan tesviyesi zımnında zikrolunan alntıncı maddenin o yolda ta‘dîli ya‘ni hazîne-i celîlenin a‘şâr bedelâtıyla zehâyir esmânından vesâireden eşhâs üzerinde olan matlûbu müdâyenât-ı umûmiye için ittihâz olunan karârın îcâb-ı tabî‘îsinden <> olduğu üzere karârnâme-i mahsûsunun üçüncü bendi hükmüne tevfîkan ahz olunup yalnız vergi ve bedelât-ı askeriye ve tekâlîf-i sâireden efrâd-ı ahâlî üzerinde olan bakāyâ için doksan altı senesi Ağustos gāyetine kadar fiyât-ı mevzû‘asıyla sikke-i mağşûşa kabûl edilmesi ve düyûn-ı hazîne-i celîlenin müdâyenât ve mu‘âmelât-ı nâs hakkında ittihâz olunan karâra tevfîkan tesviyesi Meclis-i Mahsûs-ı Vükelâ karârıyla bi’l-istîzân müte‘allik buyrulan irâde-i seniyye-i hazret-i pâdişâhî iktizâ-yı âlîsinden olarak ta‘dîlen kaleme alınan maddenin nusah-ı matbû‘ası her tarafa gönderildiği misillü on kıt‘ası dahi leffen tesyîr-i savb-ı âlî-yi Fetvâ-penâhîleri kılınmış olmağla icrâ-yı îcâbı bâbında emr ü irâde hazret-i men-lehu’l-emrindir. Fî 2 Cemâziyelevvel sene [12]97 ve fî 31 Mart sene [12]96. Tezkire sonradan tashîh olunmağla kaydı dahi tashîh olunmuşdu. Sah.