İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 190 Hüküm no: 189 Orijinal metin no: [32-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaimelerin çoğu ilga edilmiş olup geri kalan az bir miktarın da kanuna uygun olarak tahsili Ma‘rûz bende-i dîrîneleridir ki, Kavâim-i nakdiyenin külliyetlisi müceddeden ilgā olunarak meydânda bir cüz’ü kaldığından gelecek doksan altı [sene]sinin kâffe-i vâridâtı kâmilen nakden istifâ olunup kāime alınmamasına ve doksan senesi emvâlinden sikke-i hâlisa istifâ olunan gümrüklerle vâridât-ı sâireden mâ‘adâsının ber-kā‘ide humsuna mukābil bir lira için dört yüzlük kāime alınıp doksan dört senesi gāyetine kadar olan bakāyânın sikke-i hâlisa olarak istifâsı mukarrer olanlardan mâ‘adâsının mecmû‘u mukābilinde de bir lira için dört yüzlük kāime istifâ olunmasına bi’l-istîzân irâde-i seniyye müte‘allik ve şeref-sudûr buyurulup keyfiyet telgrafnâme ve tezâkir-i âcizî ile vilâyet ve müstakillen idâre olunan mutasarrıflıklar ile devâir-i lâzımeye ta‘mîmen teblîğ ve iş‘âr kılınmış olmağla Bâb-ı Vâlâ-yı Fetvâ-penâhîlerince dahi ber-mûceb-i irâde-i seniyye îfâ-yı mu‘âmele için iktizâ-yı hâlin müsâra‘aten icrâ buyurulması bâbında emr ü fermân hazret-i veliyyü’l-emrindir. Fî 21 Rebî‘ülevvel sene [12]96 ve fî 20 Şubat sene [12]95. [33. ve 34. sayfa boştur]