İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 192 Hüküm no: 192 Orijinal metin no: [36-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikah yapılmadan önce kadılıktan nikahın yapılmasında bir mahzur olmadığına dair izin alınması İstanbul Kādılığı’na Fazîletlü efendim hazretleri, Emr-i nikâhın her türlü mahâzîr ve mefâsidden mahfûziyeti maksadıyla ba‘demâ taşra misillü Dersa‘âdet ve bilâd-ı selâsede vukū‘ bulacak münâkehât için dahi kıbel-i şer‘-i şerîfden izinnâme i‘tâsının usûl ittihâzı ve verilecek izinnâmeler evvel-emirde mâni‘-i şer‘ olmadığına dâir nümûnesi vechile mahallâtdan gelecek ilmühaberlerin numaralı defter-i müstakilline aynen kayd ü hıfzıyla tahkīkāt-ı lâzıme icrâ olundukdan sonra varaka-i resmiyesine tastîr ve senedât-ı şer‘iye sicillâtı gibi her sahîfesi Meclis-i Tedkīkāt-ı Şer‘iyye’nin mührünü hâvî numaralı ve ma‘mûlün-bih ve mu‘teber sicill-i mahsûsuna sûret-i muntazamada kayd ve mukayyid tarafından kaydolunduğu işâret olunarak taraf-ı kādıdan tahtîm ve i‘tâ kılınması ve ba‘de’l-akd mührünün kemiyet ve keyfiyeti ile beraber zevcâtın akrabâ ve müte‘allikātından vesâir zevât-ı mu‘tebereden hazır bulunanların münâsiblerinin esâmîsini mübeyyin eimme cânibinden irsâl edilecek mühürlü varaka dahi sicilde dahi mukayyed olan izinnâme zeyline kayd ile keyfiyet-i kayd zahrına yazılarak zevceye verilmek üzere yine imâm efendiye i‘âde olunması ve izinnâmelerden alınacak mu‘tedil harçların ve mahallât ilmühaberleri ücretinin takdîr ve ta‘yîni ve izinnâmesiz nikâh vukū‘unda akd edenler hakkında mu‘âmele-i kānûniyenin icrâsı husûsuna taraf-ı fâzılânelerinden ve Meclis-i Tedkīkāt-ı Şer‘iyye’den verilen tezkireler üzerine bi’l-istîzân irâde-i seniyye-i cenâb-ı pâdişâhî müte‘allik buyrulduğu bâ-tezkire-i sâmiye-i vekâlet-penâhî izbâr olunmuş ve İstanbul ve bilâd-ı selâse kādıları henüz tavzîf olunmadıkları cihetle taşra hükkâmı gayr-ı muvazzaf bulunan mahaller vechile mu‘âmele olunmak lâzım geleceğinden izinnâme varakasının taraf-ı mîrîden birer guruşa mübâya‘asıyla bâkir izinnâmesinden ma‘a varaka bahâ on ve seyyib izinnâmesinden dahi kezâlik beş guruş harc-ı izinnâme ahz edilmesi ve İstanbul ve Eyüb ve Galata ve Üsküdar mahkeme-i şer‘iyelerinden ne mikdâr izinnâme varakası taleb olunur ise İstanbul kādılığının ilmühaberiyle verilmesi meclis-i mezkûrdan tensîb ve ifâde edilmiş ve varaka-i mezkûrenin keyfiyet-i mübâya‘ası zımnında îcâb edenlere tenbîhât icrâsı Mâliye Nezâret-i celîlesine ve ilmühaberler nümûnelerinin mahallâta tevzî‘iyle husûsât-ı meşrûhada eimmeye teblîgāt-ı lâzıme îfâsı Şehremânet-i celîlesine iş‘âr kılınmış olmağla ber-minvâl-i muharrer hüsn-i îfâ-yı mu‘âmeleye himmet buyurmak siyâkında tezkire-i senâverî terkīm kılındı. Fî 4 Şa‘bân sene [12]97 ve fî 30 Haziran sene [12]96. Ahmed Said