İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 197 Hüküm no: 195 Orijinal metin no: [37M-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahim Efendizâde Seyyid Mehmed Ebulhayr Efendi’nin üç ay müddetle İstanbul Kadılığı’na tayini Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘u a‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în hâlâ İstanbul kādısı olup Mecîdî nişân-ı zî-şânının ikinci rütbesini hâiz ve hâmil olan Abdurrahim Efendizâde Mevlânâ es-Seyyid Mehmed Ebulhayr Efendi -zîdet fezailehû- tevkī‘-i refî‘-i hümâyûnum [38M] vâsıl olucak ma‘lûm ola ki sen ki mevlânâ-yı müşârün-ileyhsin, sen akrân ve emsâlinin beyninde gevher-i ilm ve fazl ile mütehallî ve mevsûf olup her vechile sezâvâr-ı inâyet ve şâyeste-i mekremet olduğuna mebnî bin iki yüz doksan sekiz senesi şehr-i Rebî‘ülevveli gāyetinde hitâma resîde olacak müddet-i mu‘ayyene ki üç mâh müddetle sene-i mezbûre şehr-i Recebi’l-ferdi gurresine değin mutasarrıf olman husûsunu bi’l-fi‘il şeyhülislâm ve müfti’l-enâm olup birinci rütbe Mecîdî nişân-ı zî-şânını hâiz ve hâmil olan a‘lemü’l-ulemâi’l-mütebahhırîn efdalü’l-fudalâi’l-müteverri‘în yenbû‘u’l-fazl ve’l-yakīn Üryânîzâde Mevlânâ Ahmed Esad Efendi -edâmallâhu te‘âlâ fezâilehû- telhîs etmeleriyle mûcebince hakkında mezîd inâyet-i aliyye-i şâhâne ve mezîd re’fet-i seniyye-i pâdişâhânem zuhûra gelip avâtıf-ı aliyye-i mülûkâne ve avârif-i behiye-i tâc-dârânem ısdâr ve i‘tâ olundu. Zikrolunan İstanbul Kādılığı’na sene-i mezkûre şehr-i Recebi’l-ferdi gurresine değin mutasarrıf olup muktezâ-yı me’mûriyet ve dirâyetin üzere icrâ-yı ahkâm-ı şerî‘at-i nebeviyeye bezl-i makdûr ve sa‘y-i mevfûr eyleyesin. Fî 9 Rebî‘ülevvel sene [12]98.