İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 199 Hüküm no: 199 Orijinal metin no: [39-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vekalet hüccetleri harcı hakkındaki nizamnamenin tadil edilen nüshasının gönderildiği Taraf-ı vâlâ-yı Fetvâ-penâhîye Ma‘rûz-ı bende-i dîrîneleridir ki, Emlâk ü akār bey‘ ü şirâsında mukāvelât muharrirlerinin tanzîm etmekde oldukları vekâletnâmeler te’mîn-i mukāveleye kâfi olmamasına binâen ba‘d ezîn vekâlet hücceti i‘tâsının mehâkim-i şer‘iyeye hasrıyla beherinden maktû‘an kırk guruş istifâsı ve mehâkim-i şer‘iye nizâmnâmesinin buna dâir olan otuz sekizinci maddesinin ta‘dîli husûsuna Şûrâ-yı Devlet ve Encümen-i Mahsûs-ı Meşveret karârıyla bi’l-istîzân irâde-i seniyye-i cenâb-ı pâdişâhî şeref-müte‘allik buyrularak sâlifü’z-zikr madde-i nizâmiyenin nüsha-i musahhahasının Adliye Nezâret-i celîlesine gönderildiği gibi bir sûreti dahi leffen tesyîr-i sûy-ı âlî-yi Fetvâ-penâhîleri kılınmış olmağla Bâb-ı Vâlâ-yı Meşîhat-penâhîlerince de îfâ-yı muktezâsı bâbında emr ü irâde hazret-i men-lehu’l-emrindir. Fî 6 Cemâziyelâhire sene [1]299 ve fî 12 Nisan sene [12]98. Mehâkim-i şer‘iye nizâmnâmesinin otuz sekizinci maddesi makāmına kāim olmak üzere ta‘dîlen kaleme alınan madde-i nizâmiye müsveddesi Otuz sekizinci madde: İsbât-ı verâset i‘lâm ve hücceti için hisse-i irsiyenin mikdâr ve kemmiyetine nazaran guruşda yarım para harc alınacakdır. Nasb-ı vekîl ve ısbât-ı vekâlet hüccetleri münhasıran kısmet-i askeriye ve teftîş mahkemeleriyle bi’l-cümle mehâkim-i şer‘iyeden i‘tâ ve bu hüccetler için bey‘ veyâ ferâğ olunacak mülk ve vakf akār vesâirenin kıymetlerine bakılmayarak maktû‘an yalnız kırk guruş istifâ olunacakdır. [40. 41. 42. sayfalar boştur]