İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 199 Hüküm no: 198 Orijinal metin no: [38M-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerkes asıllı Nevres ve Zahide’nin hür olduklarına dair açtıkları davalarını isbat edemedikleri Rumeli sadâret-i aliyyesinin havâle buyrulan fî 25 Rebî‘ülevvel sene [12]99 târihli takrîri mütâla‘a olundu. Hülâsa-i meâli kabâil-i Çerâkise’den Nevres’in Mümeyyiz Mehmed Âsım Efendi muvâcehesinde ve Zahide nâm-ı diğer Şayeste’nin dahi Osman Necmi Efendi muvâcehesinde hürretü’l-asl olduklarını inkâra mukārin da‘vâ ve mezbûretândan herbiri müdde‘âlarını ısbâtdan ızhâr-ı acz ettikleri cihetle mûmâ-ileyhimâ Mehmed Âsım ve Osman [39] efendilere ve bu gibi hürriyet-i asliye da‘vâsında zü’l-yede teveccüh eden yemînin sebâtına mı yohsa adem-i ilme mi icrâ olunmasında iştibâh olunduğundan bahisle bu bâbdaki mu‘âmele-i şer‘iyenin istîzâh ve istiftâsından ibâretdir. Ma‘lûm ve fâyık-ı lüzûm-ı cenâb-ı Fetvâ-penâhîleri olduğu üzere bu gibi hürriyet-i asliye da‘vâlarında inkıyâd-ı sâbıkı ber-nehc-i şer‘î sübût bulmuş olan müdde‘î tesâddî eylediği hürriyet-i asliye da‘vâsını ısbâtdan ızhâr-ı acz ettiği takdîrde münkir olan zü’l-yede teveccüh eden yemînin adem-i ilme icrâ olunması ba‘zı sikāt tarafından iftâ edilmiş ve hilâfında bir nakil veyâ bir fetvâ taharrî olunmuş ise de görülememiş ve yemîn-i mezkûrun ber-minvâl-i muharrer icrâsı fıkha mülâyim bulunmuş olduğu tezekkür olunmağın ol bâbda emr ü fermân hazret-i men-lehu’l-emrindir. Fî 6 Rebî‘ülâhir sene [1]299. Numara 79 Kabâil-i Çerâkise’den Nevres’in Mümeyyiz Mehmed Âsım Efendi’den ve Zahide nâm-ı diğer Şayeste’nin Osman Necmi Efendi’den Salı günü huzûr-ı âlî-i hazret-i Fetvâ-penâhîlerinde hürretü’l-asl olduklarını bi’l-muvâcehe inkâra mukārin da‘vâ ve herbiri müdde‘âlarını ısbâta kādir olmadıklarını beyân edip mûmâ-ileyhimâ Mehmed Âsım Efendi ve Osman Necmi Efendi’den herbiri yemîn edecekler ise mûmâ-ileyhimâ ile bu gibi da‘vâ-yı hürriyetde sebâta mı adem-i ilme mi icrâ olunmasında iştibâh vâki‘ olduğundan ne yolda mu‘âmele-i şer‘iye icrâ olunacağının bâ-tezkire beyân olunmak üzere Mecelle Meclisi’ne havâle buyurulmak bâbında emr ü fermân hazret-i men-lehu’l-emrindir. Fî 25 Ra sene [12]99.