İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 201 Hüküm no: 201 Orijinal metin no: [43-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Düyûn-ı Umumiye-i Osmaniye İdare Meclisi ile Düyun-ı Umumiye-i Osmaniye Vâridat-ı Mahsusa İdaresi’nin kurulduğu Ma‘rûz-ı bende-i dîrîneleridir ki, Tesviye-i düyûn-ı umûmiye nizâmnâmesi mûcebince müteşekkil meclis-i idârenin unvân-ı resmîsiyle meclis-i mezkûrun devâir ile mu‘âmelâtının ne sûretle cereyân edeceği ba‘zı tarafdan suâl ve istîzâh olunup meclis-i mezkûrun karâr ve müzâkerâtı üzerine lâzım gelen mu‘âmelât ve muhâberât nizâmnâme-i mezkûrun on sekizinci maddesine tevfîkan taraf-ı Devlet-i aliyyeden ta‘yîn olunmuş olan komiser vâsıtasıyla bâ-tezâkir nezâret-i âcizîye mürâca‘atla icrâ olunmak iktizâ edeceği misillü bu meclis ma‘iyyetinde vâridât-ı mahsûsa idâresine me’mûriyet-i umûmiye dahi mezkûr nizâmnâmenin dokuzuncu maddesinde gösterildiği üzere vâridât-ı mezkûrenin el-yevm mevcûd olan kavânîn ve nizâmât dâiresinde idâresi’çün lâzım gelen husûsât ve iktizâ eden mahâl ve devâir ile terettüb eden muhâberâtı rüsûm-ı sitte idâre-i sâbıkasınca cârî olduğu vechile doğrudan doğruya tesviye ve icrâ etmesi ve meclis-i idâre için “Düyûn-ı Umûmiye-i Osmâniye İdâre Meclisi” müdüriyet-i umûmiye için dahi “Düyûn-ı Umûmiye-i Osmâniye Vâridât-ı Mahsûsa İdâresi” nâm ve unvân-ı resmîlerinin ta‘yîn [44] ve tesmiye olunması muktezî göründüğünden ol bâbda Bâbıâlî cânib-i sâmîsinden bi’l-istîzân alınan fî 1 Mayıs sene [12]98 târihli cevâb-ı sâmîde meclis-i idârece vâsıta-i muhâberât komiserlik me’mûriyeti olmak tabî‘î bulunduğu misillü müdüriyet-i umûmiyenin iktizâ eden devâir-i aliyye nezâretiyle muhâbere etmesi ve zikrolunan meclis ve müdüriyet için dahi bâlâda gösterilen nâm ve unvânların i‘lânı Encümen-i Vükelâca tensîb ve tasdîk buyrulduğu beyân-ı âlîsiyle ona göre icrâ-yı îcâbı emr ü iş‘âr buyrulduğundan keyfiyet Bâb-ı Vâlâ-yı Fetvâ-penâhîlerince de ma‘lûm olmak üzere huzûr-ı ma‘âlî-nüşûr-ı cenâb-ı Meşîhat-penâhîye arz ve izbârı Düyûn-ı İdâre-i Umûmiyesi’nden ifâde olunmağın ol bâbda emr ü fermân hazret-i men-lehu’l-emrindir. Fî 14 Receb sene 1299 ve fî 20 Mayıs sene [12]98.